2026 жылдан бастап Алматыда жаңармаған базарлардың жұмысы тоқтайды

— Біздің мақсатымыз — базарларды қайта салу ғана емес, қауіпсіз және қолайлы сауда кеңістігін қалыптастыру. Мұнда бизнес дамып, қала тұрғындары өзін жайлы сезінуі тиіс. Бұл сатып алушыларды, кәсіпкерлерді және қаланың өзін қорғауға бағытталған «Сауда қызметін реттеу туралы» заң талабы, — деді Олжас Смағұлов.

Оның айтуынша, бүгінде Алматыда 29 базар толықтай жаңғыртылды: олардың аумағында күрделі құрылыстар салынды, инженерлік инфрақұрылым ауыстырылды. Тағы 21 базар жаңғыртылып жатыр, ол жұмыс 2026 жылдың соңына дейін аяқталады. Ескірген «Жібек жолы» базарының орнына жаңа меншік иесі заманауи тұрғын үй кешені мен сауда орталығын салады.

Қала әкімдігінің мәліметінша, жалпы кейінгі жылдары қаладағы базарлардың саны 59-дан 51-ге дейін азайған.

— Әкімдік кәсіпкерлердің алаңдаушылығын түсінеді. Жалға алуа бағасының өсуі табысты арттыру мақсатында емес, қайта жаңғыртудан кейінгі пайдалану мен коммуналдық шығындардың көбеюіне байланысты болып отыр. Себебі жаңартылған базарлар орталықтандырылған жылу, су және кәріз жүйелеріне қосылады, санитарлық талаптар мен абаттандырылған аумақ қамтамасыз етіледі. Реконструкция кезеңінде жалға алушыларға сауда орындары уақытша жеңілдікпен беріледі, — деді ол.

Сондай-ақ Алматы әкімдігі Әкімшілік құқық бұзушылық туралы кодексінің 204-2-бабына сәйкес, базарларды модернизацияламау әкімшілік жауапкершілікке әкеп соғатынын хабарлады. 2026 жылғы 1 қаңтардан бастап талаптарды орындамаған базарлардың қызметі уақытша тоқтатылады.

Еске салайық, бұған дейін Алматыдағы Көк базарды жаңғырту жұмыстары қалай жүріп жатқанын жазғанбыз.