2026 жылы Персеидтерді қашан тамашалауға болады жаздың ең жарық жұлдыз жаууының күндері аталды

Тамызда Қазақстан тұрғындары жылдың ең әдемі метеор ағындарының бірі – Персеидтерді тамашалай алады. 2026 жылы бақылауға жағдай өте қолайлы болады деп күтіледі: жұлдыз жауынының шырқау шегі жаңа айдың тууымен тұспа-тұс келеді, сондықтан айдың жарығы "аққан жұлдыздарды" тамашалауға кедергі жасамайды, деп хабарлайды Tengri Life.

2026 жылы жұлдыз жауынын қашан бақылауға болады?

Персеидтер - жыл сайын тамыздың ортасында белсенділігі шыңына жететін ең танымал әрі әсерлі метеор ағындардың бірі. Space мәліметінше, 2026 жылы ағын 14 шілде мен 24 тамыз аралығында белсенді болады, ал көп метеорды 12-сінен 13-іне қараған түні көруге болады.

Аспан ашық болған жағдайда бұл кезеңде сағатына 100 метеорға дейін байқалуы мүмкін.

Жаңа айдың тууы қосымша артықшылық береді, соның арқасында табиғи жарықтандыру деңгейі төмен, бақылауға жағдай мінсіз болады.

Ғалымдардың есептеуінше, бақылауды жергілікті уақыт бойынша сағат 23:00-ден кейін, аспан әбден қарайған кезде бастаған жөн.

Instagram-дағы бұл жазбаны көру

A post shared by NASA (@nasa)

Жұлдыз жауынын қалай бақылау керек?

Персеидтерді көру үшін арнайы жабдықтың қажеті жоқ. Телескоптың да, дүрбінің де керегі болмайды, өйткені метеорларды көзбен бақылаған жақсы.

Шетелдік астрономдар бірнеше қарапайым ережені сақтауды ұсынады:

аспан жақсы көрінетін ашық жерді таңдау; қала шамдарынан алысқа шығу; көздің қараңғыға үйренуіне шамамен 30 минут уақыт беру; бір нүктеге қадалмай, аспанның мүмкіндігінше үлкен бөлігін қамту.

В.Г.Фесенков атындағы Астрофизика институтының мамандары да осыған ұқсас кеңес берді.

Олардың айтуынша, жұлдызды аспанды бақылау үшін ең жақсы жағдай елді мекеннен алыс, жарық аз түсетін және аспан ашық жерлерде болады. Сондықтан ірі қала тұрғындарына қала сыртына шығу және ауа райы болжамын алдын ала бақылау ұсынылады.

Персеидтер қалай пайда болады?

NASA мәліметінше, Персеидтер жыл сайын Жер 109P/Свифт-Туттль кометасы қалдырған шаң шлейфінен өткенде пайда болады.

Ғарыш шаңының ұсақ бөлшектері планетамыздың атмосферасына енген кезде жанып, соңынан жарық іздер қалдырады. Халық арасында оларды "аққан жұлдыздар" деп атайды.

Персеидтердің ерекшелігі – ұзын жарық іздері бар жылдам әрі жарық метеорлар. Кейде олардың арасында басқа метеорлардан ерекшеленіп тұратын өте жарық жарқылдарды – болидтерді көруге болады.

Астрономия әуесқойларын биыл басқа да аспан құбылыстары күтіп тұр. Шілденің аяғында Қазақстан тұрғындары бірнеше қызықты оқиғаны, соның ішінде "Бұғылы Ай" деп аталатын шілдедегі толық айды, бірден екі метеорлық ағынның белсенділік шыңын, сондай-ақ 10P/Темпель 2 кометасын тамашалай алады.

Дегенмен, Персеидтер дәстүрлі түрде жылдың ең көп күтілетін жұлдыз жауындарының бірі саналады. Ағынның жоғары белсенділігі мен қолайлы жағдайлар арқасында 2026 жылы Қазақстан тұрғындарының бір сағат ішінде ондаған, сәті түссе жүзге дейін жарық метеорды көруге мүмкіндігі болады.

Тағы оқыңыз: Алматылықтар сирек кездесетін құбылысты тағы қанша уақыт тамашалай алады?

Google News арқылы жаңалықтарымызды қадағалаңыз

Жазылу