Абай облысында ұлттық рух пен дала дәстүрін жаңғыртқан ерекше шара өтті

Абай облысының қасиетті Жидебай өңірінде ұлттық рух пен дала дәстүрін жаңғыртқан ерекше шара өтті. Биыл «Абай салбурыны – 2025» республикалық құсбегілер турнирі елдің түкпір-түкпірінен жиналған саятшыларды бір арнаға тоғыстырды. 

Төл өнердің тұғырын биіктетуді көздеген айтулы додаға еліміздің тоғыз облысы мен үш қаласынан қыран баптаған құсбегілер қатысты. Ұлы ақынның өзі қыран ұшырып, саят құрған киелі дала тағы бір мәрте ұлттық өнердің дүбіріне толды. 

Шараны ұйымдастыруға республикалық Бүркіт федерациясы қолдау көрсеткен. Абай Құнанбайұлының 180 жылдығына арналған бұл бәсеке Жидебайдағы «TauKum» этноауыл кешенінде өтті. Өртең тауының етегінде қыран баптаған саятшылар қоянға ителгі мен қаршығаны салса, бүркіттер түлкі мен қарсақ ілуде өнерін көрсетті.

Байрақ Тастамбек, құсбегі, Ақтөбе облысы:

- Бұл құсты жалпы баптау өте қиын. Мысалы, ат баптайды ғой, аттың сыртына қарап білесің. Бұл құстың ішінде не жатқанын білмейсің. Сыртынан біле алмайсың, бәрі бірдей. Бабын білу өте қиын. Екінің бірінің қолынан келмейді. 

Ұлттық өнерге деген қызығушылықтың артқаны құсбегілер арасында бәсекелестікті күшейтіп отыр. «Әсіресе соңғы жылдары қанат қаққан жас саятшылардың көбейгені дәстүрдің үзілмей, жалғасын тауып келе жатқанының айқын көрінісі», – дейді ұйымдастырушылар.

Тәттімбет Кәпұлы, облыстық бүркітшілер қауымдастығының президенті:

- Аспанымызда қыранымыз шаңқылдап, жерде тазымыз бауырын жазып жүгіріп жатудың өзі бабадан қалған бір мирас. Қаншама жерден қырандарын көтеріп келген бауырларымыз, ағаларымыз, Алматыдан келген қарындастарымыз қазір қыз балаларымыз да құсты көтеріп, ендігі қалған ұрпаққа кейінгі ұрпаққа қалдырсақ деген ойымыз.

Салбурын тек қыран сыналатын жарыс емес. Мұнда ұлттық ойындар дәріптеліп, құмай тазы жүгірткендердің арасынан да жүйріктер анықталды. Жиналған жұрт театрландырылған көрініс тамашалап, өнерпаздардың әні мен жырына құлақ қанды.

Берік Уәли, Абай облысының әкімі:

- Бұл бекзат өнер табиғат пен адамның жарасымы, қозғалыс пен ойлаудың үйлесімі тұрғысынан ерекше дағдыға үйрететіні баршаға аян. Көк аспан түстес байрағымызда аспан серісі, құс сұлтаны қыранның бейнеленуі де біраз жайды аңғартса керек.

Жарыс қорытындысы бойынша, құмай тазы жарысында Үржарлық саятшы үздік шықты. Қаршыға мен ителгі бәйгесінде Жамбыл облысының құсбегілері алдына жан салмады. Ал бүркіт баптағандар арасынан бірінші орын елордадан келген құсбегіге бұйырды. Жеңімпаздар арнайы дипломмен марапатталып, қаржылай сыйлыққа ие болды.

Авторлары: Рүстем Қайратұлы, Мәди Базарбеков