Аида Балаева Джеки Чанға екі ел арасындағы мәдени байланысқа қосқан үлесі үшін алғыс айтты

Фото: Мәдениет және ақпарат министрлігі

Салтанатты іс-шараға Премьер-Министрдің орынбасары – Мәдениет және ақпарат министрі Аида Балаева, Алматы қаласының әкімі Дархан Сатыбалды, Алматы облысының әкімі Марат Сұлтанғазиев, сондай-ақ қазақстандық және халықаралық киноиндустрия өкілдері қатысты.

Үкімет басшысының орынбасары Джеки Чанның Қазақстан мен Қытай арасындағы мәдени-гуманитарлық байланыстарды дамытуға қосып отырған үлесін жоғары бағалады.

«Қазақстан мәдениетін әлемдік аренада танытуға және екі ел арасындағы мәдени-гуманитарлық байланысты нығайтуға қосып отырған үлесіңіз үшін Сізге алғыс білдіремін. Алдағы түсірілім жұмыстарына сәттілік, жаңа шығармашылық табыстар тілеймін», деді Аида Балаева.

Қазақстандық актер Джеки Чанмен бірге киноға түседі

Кездесу барысында Джеки Чан Алматының талантты жас суретшілерімен және Т. Жүргенов атындағы Қазақ ұлттық өнер академиясының түлектері – жас кинематографистермен әңгімелесті. Ол жастарға шығармашылық жолда табыс тілеп, үздіксіз ізденіс пен өз ісіне деген сүйіспеншіліктің маңызын атап өтті. Кездесу соңында балалар әйгілі актерге өздері салған портреттерді тарту етті.

Іс-шара соңында қатысушылар дәстүрлі түсірілім тақтайшасымен естелік суретке түсті. Осылайша фильм өндірісінің ресми басталғаны айшықталды.

Джеки Чан, Геннадий Головкин және Михаил Шайдоров Миланда кездесті

Жоба Қазақстанның Мәдениет және ақпарат министрлігінің және Қытайдың мемлекеттік кинокомпаниясы China Film Group Corporation-ның қолдауымен жүзеге асырылып жатыр. Фильм өндірісімен отандық Sәlem Entertainment компаниясы және гонконгтық Billion Target компаниясы айналысады.

Бұл жоба Қазақстан үшін стратегиялық әрі имидждік тұрғыдан маңызды. Оның жүзеге асырылуы еліміздің мәдени, туристік және инвестициялық әлеуетін ілгерілетуге, кинотуризмді дамытуға, халықаралық ынтымақтастықты нығайтуға және Қазақстанды әлемдік деңгейдегі ірі киножобаларды түсіруге қолайлы заманауи алаң ретінде кеңінен танытуға ықпал етеді.

Бұған дейін Маңғыстауда «Доспехи Бога 4» кинофильмінің түсірілімі басталғаны туралы хабарладық. Кинокартинаға арналған алғашқы кадрлар Маңғыстау өңіріндегі ерекше табиғи ландшафттарда түсірілген. Негізгі түсірілім локацияларының бірі – ерекше пейзажымен танымал Бозжыра шатқалы болмақ.