Әкешім, кетпеші деп жиі түсіме кіреді : Қаңтарда оққа ұшқан 4 жастағы Айкөркемнің трагедиясы

2022 жылдың қаңтар айы Қазақстан тарихында ең ауыр, ең қайғылы кезеңдердің бірі ретінде қалды. Елдің әр өңірін қамтыған жаппай толқулар, бейбіт шерулердің күшпен басылуы, қарулы қақтығыстар мен тәртіпсіздіктер салдарынан жүздеген адам қаза тауып, мыңдаған азамат зардап шекті. Биыл сол Қаңтар оқиғасына төрт жыл толып отыр. Алайда уақыт өтсе де, сол күндердің қасіреті халық жадынан өшкен жоқ, деп жазады Arasha.kz.

Қаңтар – тек саяси оқиға емес, бұл – адам тағдырларының трагедиясы. Сол күндері өмірі қиылған әрбір жан – жеке бір әлем, бір отбасының үміті, бір ананың арманы еді. Сол құрбандардың бірі – 4 жастағы Айкөркем Мелдехан.

Айкөркемнің әкесі 44 жастағы Айдос Мелдехан қызының 7 қаңтарда көлікке оқ атылғанда көз жұмғанын айтады. Қайғылы жағдайдан кейін отбасының берекесі қашып, тыныс-тіршілігі түбегейлі өзгерген. Қаза болған бауырын өз көздерімен көрген балалар ауыр психологиялық соққы алып, ұзақ уақытқа дейін өз-өзіне келе алмаған.

Бес баланың әкесі Айдос Мелдехан сол бір қаралы күнді әлі күнге дейін үлкен күйзеліспен еске алады. Оның айтуынша, бұл оқиға өзі мен балаларының барлығын есеңгіретіп тастаған. 

"Алматыда тұрып жатқаныма 28 жыл болды. Үлкен балам екеуміз осы оқиғаға дейін такси жүргізушісі болып нәпақа таптық. Жолдасым балабақшада жұмыс істейді, айлығы 80 мың теңге. Жалдамалы пәтерде тұрамыз, оған айына 150 мың теңге төлейміз. Бес балам бар. Үлкен балам Бауыржан 18-де, одан кейін Жанель 16 жаста, мектепте оқиды, үшнші ұлым Бекислам – 8 жаста, 2-сыныпта оқиды. Кенже қызым Айкөркем 4 жаста еді, ал ең кішісі Рамазан 2 жаста. Әдетте балалар балабақша, мектепте болады. Сол күні бәріміз үйде болған едік", – дейді бес баланың әкесі.

Айдос Мелдеханның айтуынша, қайғылы оқиға 7 қаңтар күні кешкі мезгілде орын алған. Сол күні үлкен ұлы үйде таусылып қалған азық-түлікті алып келу үшін сыртқа шығуға ниеттенген. Ал үйдегі басқа балалар ағаларына еріп, бірге кеткен.

"7 қаңтарда кешкі сағат 6,7 шамасында бәріміз үйде болдық. Мен жуынып жатқан кезде балам ең қажетті деген азық-түлікті: нан, сүтті алып келуге кеткен. Кішкентайлар “аға, мен де барамын” деп қосылып кете барған. Үйдің жанындағы дүкендер жабық болып, ұлым көлікпен ары қарай қалаға шығып кеткен. Көлікте ұлымнан басқа үлкен қызым Жанель, кіші қызым Айкөркем, ортаншы ұлым Бекислам болған. Кіші балам ғана үйде қалған. Үлкен ұлым Бауыржан дүкен іздеп Сейфуллин Сатпаев көшелерінің қиылысына шығып кеткен. Бұрылып қайтайық деп, Желтоқсан көшесіне жете берген кезде әкімдіктің алдындағы жерасты жолының маңында көлікті автоматпен атқылай бастаған. Көлік түгел тесілген. Бұл баламның көлігі еді. Жол-жөнекей дүкеннен заттарды алып, нан таппай, тағы бір жерлерді қараймыз деп бұрылғанда болып тұр", – дейді ол.

Оның айтуынша, тәртіпсіздіктер өршіген күндері отбасы үйден шықпаған. Алайда сол кезеңде үй маңындағы бірқатар дүкендер жабылып, қажетті заттарды алу қиындай түскен.

"Келіншегім 5 күні митинг болып жатқандықтан балабақшалар істемейді деді. Содан соң үйден шықпадық. Біртіндеп дүкендер жабыла бастады. Балам Сейфуллин көшесіне дейін барып, сонда көлігі өшіп жүрмей қалған. Ұлкен балам, үлкен қызым мен кенже қызыма оқ тиді. Ұлымның иығына, қолына, басына оқ тиген. Бірден 103-ке хабарласып, жолда өтіп бара жатқан көлікті тоқтатқан. Сол көлікке отырып, Қалалық жедел жәрдем ауруханасына барған. Ол жақта кәмелетке толмаған бала болған соң балалар ауруханасына жіберген. Оған қарамастан, ұлым кішкентай қарындасын қолына көтеріп, ішке кірген. Артынша үлкен қызымды да алып сонда қалдырған. Дәрігер маған ауруханадан хабарласып, балаларыңыз осында деп шақырды", – дейді Айдос Мелдехан.

Отбасының кенже қызы, небәрі 4 жастағы Айкөркем маңдайынан тиген оқтан қаза тапқан.

"Жүрегі тоқтап қалыпты. Көп қан жоғалтқанын айтты. Ауруханаға жетпей қайтыс болған деді. Қызым жүрегімде мәңгілікке қалды. Жаңадан сөйлеп, ойнап, шапқылап жүрген еді. Үйге кіргенде "әкешім" деп құшақтаушы еді. Көз алдымда жүрген қызымды жоғалттым. Өмір сүргім келмейді. 2 жастағы баламды көріп, ашуымды басам, алданамын. Қызыма ертерек кеткім келеді. Күнде түс көремін. Түсімде "әкешім, кетпеші" деп, қызым жылап тұрғандай болады", – дейді ол Айдос Мелдехан мұңлы дауыспен.