Әлеуеті қауіпті аймақ: Қарағанды әкімдігі төтенше жағдай жариялады

Қарағандыда қала әімдігі өтенше жағдай режимін енгізді.  Шаһарда ешқандай апат тіркелмегенімен, апатты жағдайдың алдын алу мақсатында  кәріз коллекторының тозған бөлігін жедел ауыстыруға қабылданды, деп хабарлайды Аikyn.kz.

Қала әкімдігінде атап өткендей, Фёдоров су қоймасы маңында № 10 кәріз коллекторын ауқымды түрде жаңарту жұмысы басталған.

- "Қарағанды Су" ЖШС деректеріне сәйкес, № 145 пен № 169 құдықтарының аралығындағы 3,2 шақырымдық құбыр ауыстырылмақ. Бұл аумақ әлеуетті қауіпті аймақ деп танылған — себебі құбырлардың бір бөлігі бау-бақша учаскелерінің астымен өтеді, ал олардың тозуына байланысты сарқынды судың ағуы мүмкін еді. Тәуекелдердің алдын алу мақсатында коммуналдық қызметтер айналып өтетін жаңа желі салу туралы шешім қабылдады. Бұл құрылыс жұмысын жеке сектор аумақтарына тимей жүргізуге және кәріз жүйесінің үздіксіз жұмысын қамтамасыз етуге мүмкіндік береді, - делінген әкімдіктің ақпаратында. 

Қазір Қарағандыда ешқандай апат тіркелмеген. Коллектор қалыпты режимде жұмыс істеп тұр. Мамандар да жүйенің жағдайын тұрақты бақылауда ұстап отыр. Алайда жауын-шашын мен тасқын кезінде жүйеге түсетін жүктеме айтарлықтай артып, апат қаупін күшейтеді.

Әкімдіктің мәліметінше, төтенше жағдай режимі енгізілуі - қажетті материалдарды жедел сатып алуға және ұзақ тендер рәсімдерін өткізбей-ақ, құбырларды ауыстыруды бастауға мүмкіндік береді. Құрылыс жұмысы алдағы апталарда басталады деп жоспарланған. Бұдан бөлек, қала билігі бірнеше ондаған жыл бойы пайдаланылып келе жатқан басқа да кәріз желілерін кезең-кезеңімен жаңартуды жоспарлап отыр.

Осылайша, әкімдік қаланың инженерлік инфрақұрылымын тұрақтандырып, экологиялық қауіпсіздікті сақтау және тұрғындардың жайлылығын қамтамасыз етпек.