Алматыда ауыр жүк көліктерінің шамадан тыс жүктемесіне бақылау күшейтіледі

Алматы қаласының мәслихатында коммуналдық инфрақұрылым, тұрғын үй инспекциясы, энергетика, сумен жабдықтау және қалалық мобильділік жөніндегі тұрақты комиссияның отырысы өтті. Онда ҚР заңнамасындағы ауыр жүк автокөліктерінің талаптарды сақтау мәселесі қаралды, - деп хабарлайды Aikyn.kz.

Отырыста жол қозғалысын ұйымдастыру және жолаушылар көлігі басқармасының өкілдері қала бойынша жүк көліктерінің қозғалысын реттеу бойынша қабылданып жатқан шаралар мен ұсыныстар туралы баяндады. Мәліметтерге сәйкес, рұқсат етілген массасы 3,5 тоннадан асатын көліктердің қозғалысын шектеу көлік құралдарынан шығатын зиянды заттардың жалпы көлемін 6%-ға, ал кейбір қауіпті компоненттер бойынша 30%-ға дейін азайтуға мүмкіндік береді. Осындай тәжірибе Мәскеу, Санкт-Петербург, Казань, Лондон, Будапешт және Бейжің қалаларында сәтті іске асырылып келеді.

Профильдік комиссияның төрағасы, мәслихат депутаты Садир Хамраев жолдардағы шамадан тыс жүктеме мәселесі бұрыннан бар екенін және оны жүйелі шешу қажеттігін атап өтті. Оның айтуынша, қаланың қауіпсіздігі мен жолдардың сақталуы басты басымдық, алайда жүктеме нормалары жиі бұзылады, соның салдарынан жол жабыны мерзімінен бұрын тозады.

«Бүгін біз жұмыс тобын құрып, жол полициясы, көлік бақылау және жол қозғалысын ұйымдастыру басқармасымен бірлескен жұмысты күшейту туралы шешім қабылдадық. БАҚ өкілдерінің қатысуымен рейдтер ұйымдастырылып, заң талаптарын бұзатын жүргізушілер мен компаниялар анықталады», – деді депутат.

Сондай-ақ ол Алматыда жүк көліктерінің салмағын өлшейтін тек бір ғана жылжымалы станция жұмыс істейтінін айтып, көлік бақылау органдарын заманауи өлшеу құралдарымен қосымша жабдықтау қажет екенін жеткізді.

Мәслихат депутаты Руслан Идрисов қала жолдарының техникалық нормаларын сақтау маңыздылығын атап өтті.

«Қаладағы асфальт жабындысы бір оське 8 тонна жүктемеге есептелген. Біз осы норманы сақтауымыз керек. Кейбір жүк көліктері нормадан артық, 18 тоннаға дейін тасымалдайды, бұл жолдың тез бұзылуына әкеледі. Сондықтан жолдарға арнайы салмақ өлшейтін датчиктер орнатып, жүктемені автоматты түрде бақылау қажет»,-деді Руслан Идрисов.

Алматы қаласының полиция департаменті бастығының орынбасары Ержан Ұзабаев қазіргі уақытта ауыр жүк көліктерінің қозғалысына шектеу тек үш магистральда, Әл-Фараби, Достық және Назарбаев даңғылдарында бар екенін хабарлады. Ол заңнамаға өзгерістер енгізіп, мұндай аймақтарды кеңейту қажеттігін атап өтті.

Отырыс қорытындысы бойынша жол қозғалысын ұйымдастыру басқармасы, көлік бақылау және полиция арасында өзара іс-қимылды үйлестіретін жұмыс тобы құрылатын болды. Сонымен қатар депутаттар жолдардың жүктемесін өлшеуге арналған қосымша құралдармен жабдықтау және Алматы қаласында жүк көліктерінің қозғалысын оңтайландыру тұжырымдамасын әзірлеу бастамасын көтерді.

Бұдан былай заң талаптарының сақталуын бақылау және шамадан тыс жүктеменің алдын алу мәселелері тұрақты түрде ведомствоаралық өзара жұмыстың бір бөлігіне айналады.