Алматыда Менің ағаларым кітабы жарық көрді

24.KZ парақшасындағы деректерге сәйкес, Qazaq24.com ақпарат таратты..

Бүгін Алматыда Қазақстанның көрнекті мемлекет қайраткері, Ұлттық Ғылым академиясының академигі Мұхтар Абрарұлы Құл-Мұхаммедтің «Менің ағаларым» атты эсселер жинағы жарық көрді. Бұл қазақ елінің маңдайына біткен 15 тау тұлғаның өмірі мен еңбегі туралы кітап. Яғни бұған дейін газет беттерінде басылып оқырманның ықыласына бөленген шығармалар топтамасы. Алматыдағы Ұлттық кітапханада өткен тұсаукесерге қаламгерлер, ғалымдар мен оқырман жиналды.

«Менің ағаларым» атты эсселер автордың әр жылдары жазған еңбегінің жинағы. Мұнда ХХ ғасырдың соңы мен ХХІ ғасырдың басындағы айтулы он бес тұлғаның өмірі мен еңбегі толыққанды жазылған. Алғашқы эссе академик, тарихшы Манаш Қозыбаевқа арналыпты. Мұхтар Абрарұлы ұстаз бен шәкірттің жарасымды сыйластығын баяндайды.

Нұрғали Ораз, жазушы, драматург:
- Мұхаңның эсселері сондай биік деңгейдегі эсселер. Бір жағынан бүгінгі жастарға, келешектегі ұрпақтарға беретін үлгі-өнегесі мол. Достықтан да биік тұратын сыйластық болады. Мысалға, үлкенді сыйлау, ағалардың қадірін дер кезінде білу, оларды бағалау осы кітапта анық байқалады.

Автор Халық Қаһармандары Рақымжан Қошқарбаев пен Қасым Қайсеновтің соғыс жылдарындағы көпшілікке белгісіз ерлігін «Жаужүрек» және «Қаһарман» эссесінде нақты құжаттармен дәйектейді. Одан бөлек, заңгер Салық Зиманов, Төрегелді Шарманов, Өмірбек Жолдасбеков, Зейнолла Қабдоловтың және тағы басқа қайраткерлердің өмір жолы туралы да қалам тербеген.

Қансейіт Әбдезұлы, Қазақстанның еңбек сіңірген қайраткері:
- Жиырмасыншы ғасырдың күллі тарихын көз алдымыздан өткізетін үлкен бір кітаптың тұсауы кесілді. Кітаптың аты – «Менің ағаларым» деп аталады. Осының ішінде 15 тұлға бар. Барлығы қазақтың егемендігіне, ғылымына, біліміне, өнеріне, мәдениетіне, әдебиетіне еңбек сіңірген үлкен-үлкен тұлғалар.

Кітап «Атамұра» баспасынан жарық көрді. Көрнекті мемлекет қайраткері, академик Мұхтар Абрарұлының 15 тұлға туралы эссесі өз кезінде мерзімді басылымдарда жарияланып, оқырманның жоғары бағасын алған. «Менің ағаларым» жинағы жалғасын тауып, толыға түседі», - деді автор.

Авторлары: Аршын Кемелжан, Радик Жакупов

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.