Apple бүктелетін смартфондар бәсекесіне қосылды: Huawei мен Xiaomi не ұсынды?

Коллаж: ИИ 
Жиналмалы смартфондар нарығында бәсеке қыза түсті. Бірнеше күннің ішінде Huawei, Xiaomi және Apple жаңа флагмандық модельдерін таныстырды. Ал Apple үшін iPhone Duo компанияның осы сегменттегі алғашқы смартфоны болды.
Huawei мен Xiaomi жаңа құрылғыларын 7 қыркүйекте, Apple таныстырылымынан екі күн бұрын көрсетті. Қытайлық өндірушілер тиісінше Mate XT2 және Xiaomi 18 Fold модельдерін ұсынды. Ал 9 қыркүйекте Apple өзінің алғашқы жиналмалы смартфоны — iPhone Duo-ны таныстырды.
Huawei үш секциялы смартфонды дамытуды жалғастырды
Huawei Mate XT2 моделін таныстырды. Бұл — компанияның екі жерден бүктелетін смартфонының жаңа буыны. Кәдімгі «кітап» форматындағы жиналмалы смартфондардан айырмашылығы, құрылғының экраны екі жерден бүктеледі. Толық ашылған кезде оны планшет форматындағы үлкен экран ретінде пайдалануға болады.
Mate XT2 жаңа Kirin 9050 Pro процессорымен жабдықталған. Huawei жиналу механизмін жетілдіріп, құрылғының суға төзімділігін арттырған. Сондай-ақ экрандағы ақпаратты жанында тұрған адамдардың көруін шектейтін функциясы бар нұсқа ұсынылды.
Қытайда Mate XT2 бағасы 19 999 юаньнан, яғни шамамен $2 980-нан басталады. Ең қымбат нұсқасы 24 999 юаньға немесе шамамен $3 725-ға бағаланған. Сатылым 12 қыркүйекте басталады.
Huawei Қытайдағы жиналмалы смартфондар нарығында айтарлықтай басымдыққа ие. Reuters дерегінше, 2026 жылдың екінші тоқсанында Қытай нарығындағы жиналмалы смартфон жеткізілімдерінің шамамен 68%-ы Huawei үлесіне тиесілі болды.
Xiaomi арзанырақ бағаға басымдық берді
Сол күні Xiaomi компаниясы Xiaomi 18 Fold моделін таныстырды. Huawei Mate XT2-ден айырмашылығы, бұл құрылғы жиналмалы смартфондарға үйреншікті «кітап» форматында жасалған.
Жаңа модельдің ерекшеліктерінің бірі — Xiaomi-дің өз XRing O3 процессоры. Смартфон толық ашылған кезде бір уақытта үш қосымшамен жұмыс істеуге мүмкіндік береді.
Xiaomi 18 Fold бағасы конфигурациясына қарай 10 999–14 999 юань, яғни шамамен $1 540–2 100 аралығында. Осылайша, Xiaomi-дің бастапқы нұсқасы Huawei мен Apple-дің жаңа жиналмалы смартфондарына қарағанда айтарлықтай арзан.
Apple нарыққа соңғы болып кірді
9 қыркүйекте Apple компания тарихындағы алғашқы жиналмалы смартфон — iPhone Duo-ны таныстырды. Оның бастапқы бағасы $1 999.
Жиналған күйінде құрылғыда диагоналі 5,4 дюйм болатын сыртқы экран бар. Ашылған кезде пайдаланушы 7,6 дюймдік ішкі дисплейге қол жеткізеді. Смартфон A20 Pro процессорымен жұмыс істейді, бірнеше қосымшаны қатар пайдалануға және Apple Pencil-ді қолдануға мүмкіндік береді.
iPhone Duo сатылымы 23 қазанда басталады деп жоспарланған.
Apple бұл сегментке негізгі бәсекелестерінен әлдеқайда кеш кіріп отыр. Huawei, Samsung, Xiaomi және басқа өндірушілер бірнеше жылдан бері жиналмалы смартфондар шығарып, мұндай құрылғылардың бірнеше буынын нарыққа ұсынды.
Алайда Apple үшін нарыққа кеш кірудің өз артықшылығы болуы мүмкін. Соңғы жылдары өндірушілер жиналмалы смартфондардың негізгі мәселелерін — корпустың қалыңдығын, шарнирдің сенімділігін, экрандағы бүктелу ізін, батареяның жұмыс уақытын және жоғары бағаны азайтуға күш салды.
Енді бұл нарықтағы бәсеке жаңа кезеңге өтті. Қыркүйектің бірнеше күнінде үш технологиялық алпауыт жиналмалы смартфонға қатысты үш түрлі тәсілін көрсетті: Huawei үш секциялы құрылғыны дамытуды жалғастырса, Xiaomi салыстырмалы түрде қолжетімді «кітап» форматындағы модель ұсынды. Ал Apple алғаш рет iPhone экожүйесін жиналмалы форматқа көшірді.
Бағасы жағынан да айырмашылық айқын: $1 999 тұратын iPhone Duo Xiaomi 18 Fold-тан қымбат, бірақ Huawei Mate XT2-ден едәуір арзан.