Ақмола облысында жануарлардың адамға шабуылы жиілеп барады

Ақмола облысының бас мемлекеттік санитарлық дәрігері Серік Омарханов тістеу бойынша эпидемиологиялық жағдайға қатысты пікір білдірді.

Ақмола облысы бойынша мемлекеттік сараптама департаментінің мәліметінше, былтыр 12 айда жануарлардың тістеуі бойынша азаматтардың шағымдары 2024 жылдың сәйкес кезеңімен салыстырғанда 544 жағдайға немесе 21,9% өскен. Жыл бойы барлығы 2481 адам медициналық көмекке жүгінген.

— Өтініштердің басым бөлігі Көкшетау қаласына тиесілі — жалпы санның 24,1%. Мәселен, 2025 жылдың 12 айында Көкшетауда 600 шақыру тіркелсе, оның 194-і (32,3%) балалар мен жасөспірімдерден, — деді Серік Омарханов.

Өтініш білдіргендердің ішінен 2481 адам вакцинациялауға тағайындалды, 2472 адам (99,6%) екпе алды, оның ішінде 1639 адамға (66,3%) антирабиялық вакцина салынса, иммуноглобулин және антирабиялық вакцина 833 тұрғынға (33,7%) егілді.

Бұл ретте 963 өтініш білдіруші — ауыл тұрғындары. 2025 жылы өтініш бергендердің ең көп пайызы 6-14 жас аралығындағылар болды — 673 (27,1%).

2026 жылдың қаңтар айының басынан бері облыста тістеп алудың 44 жағдайы тіркелген.

— Олардың 59%-ын ит қапқан, 38,6%-ын мысық тырнап, тістеген. Шақырулардың басым бөлігі Көкшетау қаласынан — 12 жағдай (27,2%). Оның төртеуі балалар мен жасөспірімдер арасында, сегізі ересектер арасында тіркелді, — деп қосты облыстың бас санитарлық дәрігері.

Көмек сұрағандардың ең көп пайызы 46 жастан асқан адамдар — 14 жағдай және 6-14 жас аралығындағы балалар — 12 жағдай. 18-25 жас аралығындағы жастар арасында бес жағдай, 36-40 жаста төрт, 0-5 жас аралығында үш, 15-17 жас аралығында екі, 26-30 жаста екі, 31-35 жас аралығында бір, 41-45 жас аралығындағы бір адам тіркелді.

Айта кетейік, ШҚО-да түз тағыларын құтыруға қарсы вакциналау жұмыстары жүргізіліп жатыр.