АҚШ Дания Гренландия ортақ жұмыс тобын құрады

АҚШ, Дания және Гренландия өкілдерінің Ақ үйдегі жиыны нәтижесіз аяқталды. Вашингтон да, Копенгаген де Гренландияға қатысты өз дегендерінен қайтпады. Десе де жоғары деңгейлі жұмыс тобын құруға уағдаласты. Дональд Трамп Гренландияны АҚШ қарамағына қосу идеясынан бас тартпай тұр. 

Ердана Ержанұлы, тілші:

- «Келіспеуге келістік». Дания мен Гренландияның Сыртқы істер министрлері Ақ үйдегі кездесуден соң осылай деді. Расмуссен расын айтты. Көзқарастар қарама-қайшы. Дегенмен тараптар ортақ шешім табу үшін жоғары деңгейлі кездесулер өткізуді жалғастыру керек деген ұйғарымға келді. 

Ларс Лёкке Расмуссен, Дания Сыртқы істер министрі:

- «Ортақ шешім жолын табу үшін жоғары деңгейлі жұмыс тобын құруға келістік. Топ АҚШ-тың қауіпсіздікке қатысты алаңдаушығын ескеріп, Дания Корольдігінің талап-тілегін сақтауға басымдық береді. Алғашқы кездесу алдағы апталарда өтеді».

Даниялық дипломат Копенгаген-Вашингтон достығына биыл 225 жыл толғанын алға тартып, Ауғанстандағы бірлескен дат-американ миссияларын еске алды. Жылы сөйледі. Қытайлық инвестициядан да бас тартқанын айтты. НАТО елдерімен бірге арктикалық қауіпсіздікке қатысты әрекетке көшкенде бұған дейінгі америкалық президенттердің селқостық танытқанын алға тартып, Трамптың үніне үн қосты. Ақ үй басшысы да «қайтсек те басып аламыз» демей, жақсы нәтижеге үміт артатынын жеткізді. 

Дональд Трамп, АҚШ президенті:

- Менің Даниямен қарым-қатынасым жақсы, кездесулер оң нәтиже береді деп үміттенемін. 

Гренландияның құны АҚШ үшін 700 млрд долларға жетуі мүмкін деді. Бұл Трамп күткен оң нәтиже ме, оны уақыт көрсетер. 

Авторлары: Ердана Ержанұлы, Эндрю Фанг