Ақтөбе Хромтау жолының бір бөлігі қолданысқа берілді

«Ақтөбе-Хромтау» жолының бір бөлігі жөнделіп, қолданысқа берілді. Бұл бағыт соңғы жылдары жүргізушілердің сынына жиі ұшырған еді. «Батыс Еуропа – Батыс Қытай» халықаралық дәлізі бойындағы бір учаскеде қайта жаңғырту жұмыстары былтыр басталды. Кешенді жоба аясында республикалық маңызы бар жол бірінші техникалық санатқа сай болады. 

Мансұр Есқожин, тілші:

- Ақтөбе Хромтау бағытындағы жол төрт жолақты болады. Қазіргі таңда екеуі салынып жатыр. Кейбір учаскелерде құрылыс жұмыстары тәмамдалып, 28 шақырым жаңа жол қолданысқа берілген.

Еліміздің логистикалық инфрақұрылымы үшін маңызды бағыттардың бірін жаңғырту барысында екі көпір мен екі өткел тұрғызылды. Бұл тауар тасымалы мен көлік қатынасын жеделдету үшін қажет. Учаскеге тиесілі қалған екі жолағы келер жылы төселеді. 

Нұралы Тойымбетов, учаске басшысы:

- Қазіргі кезеңде топырақ жұмыстары салынып жатыр және де жол төсеу жұмыстары жалғасып жатыр. Қыстың аяғында, ауа райы мүмкіндік берген кезде келесі жылға материалдарды дайындаймыз. 

Облыс орталығынан Хромтау, Қарабұтақ, Ұлғайсын бағыты жиырма жыл бұрын жөнделген еді. Тәулігіне үш мың көлік өткізе алатын екі жолақты ескі жолмен қазір күніне 18 мың техника өтеді. Сондықтан 262 шақырым жол жеті учаскеге бөлініп, қайта жаңғыртылып жатыр.

Дархан Иманашев, «Қазавтожол» ҰҚ АҚ басқарма төрағасы:

- Қалған нысандарда қаржы институттары анықталды. Қазіргі таңда конкурстық процедуралар өтіп жатыр. Қатысушылардан сегіз компания бар. Сол компаниялардың арасынан банкпен бірлесіп толық құжаттарын қарап жатырмыз. Жоспар бойынша жұмыстарды ендігі жылдан бастап толық бастаймыз деген жоспар бар. 

Өңірдің транзиттік әлеуеті жоғары. Биыл облыста жол құрылысына арналған 186 жобаға 68 млрд теңге бөлініп, 565 км жол пайдалануға берілді.

Авторлары: Мансұр Есқожин, Айнадин Молдабеков, Айбек Даутов