Ақтөбе облысында жергілікті өнім көлемі артады

Ақтөбе облысында сүт-тауарлы ферманы көбейту керек. Әйтпесе сүт зауыттары шикізаттан тапшылық көруі мүмкін.

Сала мамандары осылай дейді. Сондықтан ауылшаруашылығы өнімін өндірушілерге жеңілдетілген несие беріліп, мемлекеттік бағдарламалар аясында қолдау көрсетіліп жатыр. Ет пен нан өнімдері жеткілікті. Жергілікті кәсіпорындар ішкі сұранысты қамтамасыз ете алады. Жалпы өңір шаруалары биыл 353 млрд теңгенің өнімін өндірген.

Қаладағы мына сүт зауыты тәулігіне жүз тоннаға дейін өнім өндіреді. Жергілікті нарықпен қатар көрші облыстарға және Алматы, Астана қалаларына дайын өнімдерін жеткізеді. Зауытқа қажетті шикізаттың, яғни сүттің 50 пайызын ғана жергілікті фермалардан сатып алады. Бұл жеткіліксіз. Жауаптылар бұл мәселені шешу үшін Солтүстік Қазақстан облысының тәжірибесіне сүйенді. Яғни тауарлы сүт фермасын көбейтуге 7,5 млрд теңге жеңілдетілген несие берілді.

Қуантай Әбішев, Сүт зауытының өндіріс инженері:

- Сүт өндіретін фермамыз бар. Соны келесі жылы наурыздан бастап 50 пайызға дейін көбейтейін деп жатырмыз. Соған жұмыс істеп, ғимараттарын салдық, малдарын әкеліп жатырмыз. 2027 жылдан бастап сүтімізді шығаратын боламыз, өзіміз қамтамассыз етеміз.

Негізгі азық-түлік себетіндегі 32 өнімнің 24 түрі облыс аумағында өндіріледі. Қарақұмық жармасы, күріш, қант, тұз, сарымсақ, бұрыш пен алма сияқты өнімдер жергілікті климаттың ерекшелігіне байланысты өзге өңірлерден тасымалданады. Сондықтан атқарушы билік Ақтөбенің өзінде шығарылатын тауарлармен ішкі нарықты 100 пайыз қамтуды көздейді. Ол үшін шаруаларды қолдауға бағытталған мемлекеттік бағдарламалар жүзеге асып жатыр.

Айсұлтан Кеңбейлов, облыстық Ауыл шаруашылығы басқармасы басшысының орынбасары:

- Мемлекет тарапынан ауыл шаруашылығы тауарларын өндірушілерді субсидиялауға биылғы жылы 15 млрд теңге қаражат бөлінді. Қаражат уақытылы өтінімге сәйкес төленіп жатыр. Жалпы жеңілдетілген несиелердің көлемі 20 млрд-қа жуықтайды.

Жергілікті көкөніспен де нарықты қамтамасыз ету мақсатында өңірде суармалы алқаптар ұлғайтылып жатыр. Биыл 4 мың гектар жерге ылғал тарату жүйесі жүргізілді. Қазір технология енгізілген алқап көлемі 15 мың гектарға жетті. Ал 2030 жылға дейін суармалы жердің үлесі 30 мың гектар болады- дейді мамандар.

Ақтөбе облысының ауылшаруашылығы саласында алдағы үш жылда  жалпы құны 65 млрд теңге болатын 50 ірі инвестициялық жоба жүзеге асырылады. Өңірдің азық-түлік қауіпсіздігіне үлес қосатын 10 кәсіпорын жыл соңына дейін іске қосылуы тиіс.

Авторлары: Мансұр Есқожин, Айнадин Молдабеков, Айбек Даутов