Шикізаттық емес өнім өндірушілерді қолдау артады

Елімізде шикізаттық емес өнімдер экспорттаушыларын ынталандыру шаралары әзірленді.

Экономиканы әртараптандыру аясында шикізаттық емес экспортты белсенді дамытуға және өткізу нарықтарын кеңейтуге күш салынады.

Қосылған құны жоғары өнім шығаратын отандық экспорттаушыларды қолдау тетігі көбейеді. Осылайша отандық тауарларды шетелдерде және халықаралық электрондық алаңдарда ілгерілету бағытында жәрдем көрсетіледі. Бұл ретте мемлекеттік қолдауға ие болған экспорттаушылар өз кәсіпорындарын белсенді түрде жаңғыртып, өндірісті локализациялау үлесін арттыруы тиіс.

Серік Жұманғарин, ҚР Премьер-министрінің орынбасары - Ұлттық экономика министрі:

- Металлургия, машина жасау, мұнай-газ химиясы және АӨК-де жоғары қайта бөлудің 17 ірі жобасын жүзеге асыру жалғасуда. 2029 жылға дейін Ұлттық инфрақұрылымдық жоспарды жүзеге асыру маңызды рөл атқаратын болады. Белсенді кезеңге Энергетикалық және коммуналдық секторларды жаңғырту жөніндегі ұлттық жобаны жүзеге асыру кіреді.

Сапалы экономикалық өсімді қамтамасыз ету үшін шикізаттық емес секторларды дамытуға, еңбек өнімділігін арттыруға, экономиканы технологиялық жаңартуға және цифрландыруға баса мән берілмек.

Бауыржан Ысқақов, экономист:

- Көбінесе сырттан келетін инвесторларға бізге әлі шикізаттық мемлекет ретінде қызығушылық танытады. Бізде мұнайдың өзі өңдеудің 8 фазасынан өтетін болса, біз оны ары кетсе 1-3 фазасынан кейін барып экспорттап жатамыз. Осы жерде әртараптандырудың бір жолы жаңағы шикізаттың өзін біршама салаға қажетті өнімге айналдырып барып, соны сыртқа шығарудың жолдарын қарастырса екен.

Осыған байланысты Премьер-министр Олжас Бектенов Сауда, Ауыл шаруашылығы және Өнеркәсіп министрліктеріне мүдделі мемлекеттік органдармен бірлесіп, шикізаттық емес өнімдерді экспорттаушыларды ынталандыру және өткізу нарықтарын кеңейту бойынша кешенді шараларды әзірлеуді тапсырды.

Авторлары: Мирлан Алтынбек, Саят Башимов