Жасыл энергетиканы қолдау артады

Қазақстанның Даму Банкі елімізде алғаш болып Халықаралық «Жасыл климат қорының» аккредитациясын алды.

Бұл – климаттың өзгеруіне қарсы күрес және оған бейімделу үшін құрылған ең ірі халықаралық қаржы ұйымы. Аталған аккредитация Қазақстанның Даму Банкіне жеңілдетілген қаржыландыру көздерін тартып, еліміз үшін басым бағыттар саналатын жаңартылатын энергетика мен инфрақұрылым салаларындағы ауқымды жобаларды жүзеге асыруға мүмкіндік береді. Сондай жобалардың бірі – Ақтөбе облысындағы «Хромтау» жел электр станциясы, жоба Қазақстанның Даму Банкінің қолдауымен іске қосылды.

Хромтау ауданында іске қосылған жел электр станциясы жылына шамамен 500 млн киловатт/сағат «жасыл» энергия өндіре алады. Энергия Дөң кен байыту комбинаты мен Ақтөбе ферроқорытпа зауытының өндірістік қажеттіліктерін қамтамасыз етуге жұмсалады. Жобаны жүзеге асыру жыл сайын 440 мың тонна көмірқышқыл газының ауаға таралуын болдырмай, 300 мың тонна көмірді үнемдеуге мүмкіндік береді. 

Нұрбол Ерниязов, «Хромтау» ЖЭС пайдалану жөніндегі басшысы:

- Жобаны ERG Capital Projects компаниясы жүзеге асырды. Қаржылық қолдауды Қазақстанның Даму Банкі көрсетті. Құрылыстың жалпы инвестиция көлемі 79 млрд теңгеден асады.

Экология мен экономика үшін маңызды жобаларға инвестиция тарту мүмкіндігі енді арта түспек. «Жасыл климат қорының» аккредитациясын алған Қазақстанның Даму Банкі қосымша ресурстарды тарту арқылы жаңартылатын энергия көздері мен энергетикалық және коммуналдық инфрақұрылымды жаңғырту бастамаларын қаржыландырады.

Дина Жанәділ, «Қазақстанның Даму Банкі» АҚ басқарушы директоры:

- Бүгінде еліміздегі жаңартылатын энергияның әрбір төртінші мегаваты Қазақстанның Даму Банкі қатысуымен жүзеге асырылып жатыр. Бұл – бастамасы ғана. «Жасыл климат қорының» қолдауының арқасында осындай ауқымды жобаларды іске асырып, 2060 жылға дейінгі төмен көміртекті даму стратегиясын жүзеге асыруға мүмкіндік туады.

Биыл Қазақстанның Даму Банкі 59 жобаны қаржыландырды. Олардың іске қосылуы 13 мыңнан астам жаңа жұмыс орнын ашуға мүмкіндік береді. Солардың қатарында қуаты 42 МВт болатын Жетісу облысындағы шағын су электр станциясы да бар.

Авторлары: Мансұр Есқожин, Болатбек Молдағалиев, Айбек Даутов