Ақтөбеде бала батутта мертігіп, мүгедек болды: іс қайта қаралды

АЛМАТЫ, 9 қаңтар – Sputnik. Ақтөбеде батутта мертігіп, мүгедек болып қалған жеткіншектің ата-анасы бірінші сатыдағы сот үкімімен келіспеді. Іс апелляциялық сотта қайта қаралды, деп хабарлайды облыстық сот.

Баланың ата-анасы батут орталығынан материалдық және моральдық залалды өндіру туралы талап қойған.

"Бірінші сатыдағы соттың анықтауынша, кәмелетке толмаған бала батут орталығында жарақат алған. Бұл денсаулыққа орташа ауырлықтағы зиян келтіруге әкеп соққан. Кейіннен оған үшінші топтағы мүгедектік тағайындалған", - дейді сот.

Бала үрленбеген матрацқа құлаған. Салдарынан бірнеше ота жасалды. Ұзақ уақыт ауруханада болып, сабаққа да бара алмаған.

Бірінші сатыдағы сот моральдық зиянды өтеу ретінде 2 000 000 теңге өндіріп алу туралы шешім шығарған. Іс апелляциялық сатыда қайта қаралды.

"Апелляциялық сатыдағы сот моральдық зиянды 7 000 000 теңгеге дейін ұлғайту қажет деген қорытындыға келді", - дейді Ақтөбе облыстық сотының баспасөз қызметі.