Астанада Қоғамдық кеңестердің IV республикалық мәжілісі өтті

Бас қалада қоғамдық кеңестердің 4-Республикалық мәжілісі өтті.

Жиын Қазақстанның XII Азаматтық форумы аясында ұйымдастырылған. 3 жылда бір өтетін мәжілісте елдегі қоғамдық кеңестердің қызметіне қатысты өзекті мәселелер талқыланды. Яғни халықты қоғамдық процестерге тарту мүмкіндіктері мен тетіктері, мемлекеттік органдар қызметін бақылау мен мониторингтің тиімділігі қаралды.

Қоғамдық кеңестердің 4-і республикалық мәжілісінде елдегі билік пен қоғам арасындағы келелі жайттар сөз етілді. Әуелі қоғамдық кеңестердің ролі мен оның ел өміріндегі өзекті мәселелерге белсене араласуын күшейту жайы талқыланды. Яғни елдің өркендеуіне азаматтық институттар да өз үлесін қосуы тиіс. 

Аида Балаева, ҚР мәдениет және ақпарат министрі:

“Кеше Парламенттік реформалар жөніндегі жұмыс тобының Мемлекет Басшысының қатысуымен алғашқы отырысы өтті. Президент атап өткендей, бұл мәселе қоғамның кеңінен тартылуын, барлық халық ұсыныстарын талдауды және зерделеуді талап етеді. Мен Конституция баптарына ұсыныстар мен толықтырулар әзірлеу және талқылауға тікелей қатысу арқылы қоғамдық кеңестерді осы процеске тартуды маңызды деп санаймын”. 

Мәжілістің алғашқы секциясында қоғам белсенділері халықты қоғамдық процестерге тарту мүмкіндіктері мен тетіктерін талқылады.

Артынша «Қоғамдық бақылау: нақты өкілеттіктер және үздік тәжірибелер» тақырбында мемлекеттік органдар қызметін бақылау мен мониторингтің тиімділігі қаралды.  

Зұлфұхар Ғайыпов, Астана қ. қоғамдық кеңесінің төрағасы:

- Көтеріліп жатқан мәселелер өте өзекті деп ойлаймын. Себебі уақыт өзгеріп жатыр. Кеше ғана Президент конституциялық реформа әрі қарай жалғасады деді. Оның қасында қоғамдық кеңестердің қызметін үйлестіретін қоғамдық кеңес туралы заңда кішкене өзгерістер енгізу керек екенін уақыт дәлелдеп тұр. Өйткені арада он жыл өтті. Он жылда біраз өзгеріс болды. 

Бүгінде ел бойынша 263 қоғамдық кеңес жұмыс істейді. Оның ішінде республикалық деңгейде – 35, жергілікті деңгейде 228 қоғамдық кеңес жұмыс атқарып отыр. Кеңестер құрамында шамамен 4000 қазақстандық бар. Қоғамдық бақылау өкілеттігі аясында қоғамдық кеңестер азаматтардың құқықтары, бостандықтары мен міндеттеріне қатысты 1500-ден астам нормативтік-құқықтық акт жобасын қарастырған.

147 жоба бойынша тұрғындардың өмір сапасы мен тұрмыс жағдайын жақсартуға бағытталған ұсыныстар әзірленген.

Сәлімбай Шунеев, ҚР Мәдениет және ақпарат министрлігі жанындағы қоғамдық кеңестің төрағасы:

- Қоғамдық кеңес институты азаматтық қоғаммен мемлекеттік органдардың ортасында алтын көпір болу мақсатында құрылған. Кезінде Аристотель одан да басқа ғұламалар бұл қоғамдық бақылауды мемлекеттің дамуы үшін өте қажет деп жазып кеткен. Жалпы 263-тің жұмысына тоқталсақ, елге маңызы бар 9000-ға жуық нормативтк актілер қаралған. 360ден астам мемлекеттік орган басшыларының жұмысы тыңдалған. 

Мәжіліс қорытындысы бойынша қоғамдық кеңестер қызметінің құқықтық және ұйымдастырушылық негіздерін жетілдіруге бағытталған ұсыныстар әзірленеді. Бұл шешімдер болашақта уәкілетті мемлекеттік органдардың жұмысында ескеріліп, одан әрі реформаларға да негіз болады деп күтілуде.

Әлішер Әли