Атаулы жыл қорытындыланды

Ақтау биыл Түркі әлемінің мәдени астанасы атанып, осының аясында көптеген іс-шара өткені белгілі. Кеше осы шаһардағы салтанатты жиында атаулы жыл қорытындыланды. Оған ТҮРКСОЙ-ға мүше елдердің мәдениет министрлері мен тиісті сала өкілдері, сондай-ақ Түркі мемлекеттері ұйымы Ақсақалдар кеңесінің төрағасы Бинали Йылдырым қатысты.

Салтанатты рәсімде сөз алған еліміздің Мәдениет және ақпарат министрі Аида Балаева мәдени астана мәртебесі өңір үшін құрмет қана емес, сонымен бірге түркі әлемінің бай мұра­сын кең аудиторияға та­ныс­­тыруға мүмкіндік бер­ге­нін атап өтті.

«Тарихи қала осы жауап­кершілікті абыроймен атқарып, өзіне жүктелген міндетті жо­ғары деңгейде орындады деп нық сеніммен айта аламыз. Жобаның табысты жүзеге асуына Прези­дентіміздің түркі мемле­кеттерінің бірлігін нығай­туға, гуманитарлық ын­тымақ­тастықты дамытуға бағыт­талған тұрақты мәдени саясаты айрықша рөл атқарды. Ел Президентінің мәдениет, ғылым мен білім, жастар алмасуы салаларындағы нақты бастамаларға негіз­дел­ген түр­кі интеграциясы жөніндегі маңызды ұстанымы бүкіл түркі әле­мінде кең қолдау тауып, жоғары бағаланды. Ақтауда жүзеге асқан ТҮРКСОЙ жобалары Мемлекет басшысы бастамаларының нақты нәтижеге айналып, бауырлас халықтарды бұрынғыдан да жақындастыра түскенін айқын көрсетті», деді министр.

Айтулы жыл аясында Ақтауда мыңдаған ғалым мен өнерпазды, қонақ­тарды біріктірген 30-дан астам ірі халықаралық іс-шара өтті. Олардың қатарын­да музыка, эпос, фольклор және би фестивальдары, шы­ғар­машылық симпозиумдар мен ғылыми конференциялар, сондай-ақ балалар мен жас­тарға арналған түрлі байқаулар бар.

Сонымен қатар жыл шең­берінде өткен маңызды іс-шаралардың бірі – 7 елден келген 9 театр қатысып, үш мыңнан астам көрермен тамашалаған III халықаралық театр фестивалі. Сондай-ақ 47 конкурстық фильм ұсынылып, түркі кине­матографистері үшін шығар­машылық алаңға айналған «Қорқыт ата» халық­аралық кинофестивалі де аншлагпен өтті. «Көшпенді қуыршағы» атты бірінші халықаралық Қуыршақ театр­лары фес­тивалі де көрер­мен­ге айрық­ша әсер қалдырды.

Өз кезегінде салтанатты іс-шараның арнайы қонағы, Түркі мемлекеттері ұйымы Ақсақалдар кеңесінің төрағасы Бинали Йылдырым Маңғыстау жұртының қонақ­жайлығы мен Ақтау қала­сының бай мәдениетіне ерекше тоқталды.

«Қазақстан – Түркі әлемінің тұрақтылығын қамтамасыз етіп тұрған тірек елдердің бірі ғана емес, оның қуатты орталығы. Түркі мемлекеттері ұйы­мын­­дағы сындарлы рөлі, экономикалық орнық­ты­лығы, бай мәдени мұрасы және тұрақты дамуы – Қазақ­станды Түркі елде­рінің арасында көшбасшы деңгейге көтеріп отыр. Қазақстан Президенті Қасым-Жомарт Кемелұлы Тоқаевтың көрегендігі мен көшбасшылығы өңірлік бейбітшілікті нығайтуға, көпвекторлы дипломатияны дамытуға және Түркі әлемінің бірлігі идеясын ілгерілетуге орасан үлес қосып келеді. Бүгінгі салтанатты іс-шара – осы бірізді саясаттың және Қазақстанның инклюзивтілік дәстүрінің жарқын көрінісі», деді Б.Йылдырым.

Ақтауда жүзеге асырылған жұмыс халықаралық дең­гейде жоғары бағасын алды. ТҮРКСОЙ Бас хатшысы Сұлтан Раев қала бүкіл түркі қауымдастығы үшін бауыр­­ластықтың және жаңа мүм­кіндіктердің рәмізіне айнал­­ғанын айтты.

«Бүгін біз Каспийдің көгілдір толқынына көз тас­тап тұрып, бір жылдың тарихын, бірліктің шежіресін ой елегінен өткізіп тұрмыз. Бұл жыл – жүректерді жақын­датқан, бауырластықты биік­теткен қасиетті жыл болды. Күн астында көк ту желбіреп, жер бетінде бауырлас жұрттың әуені шырқалды. Жыр мен күй, би мен сөз – бәрі де ортақ рухымыздың үнін жеткізді», деді С.Раев.

Салтанатты іс-шара гала-концертпен жалғасты. Оған Әзербайжан, Қазақстан, Қырғызстан, Түркия және Өзбекстаннан 300-ден аса әртіс қатысып, көрер­мен­дер­ге вокалдық және би қойылымдарын ұсынды. Концерт бағдарламасы түркі елдерінің сахналық өнерінің ғажайын сан алуандығын көрсетіп, мерекелік көңіл күй мен шығармашылық бірлік атмосферасын қалып­тас­тырды. Концерттен кейін Ақтау қаласының әкімі «Түркі әлемінің 2026 жылғы мәдени астанасы» атағын Өзбекстанның Әндіжан қала­сы­ның хокиміне тапсырды.