Атырауда 11 сынып оқушысы басынан жарақат алды қылмыстық іс қозғалды

АСТАНА, 30 қараша – Sputnik. Атыраудағы мектептерінің бірінде 11-сынып оқушысына дене жарақатын келтіру бойынша қылмыстық іс қозғалды, деп хабарлайды Sputnik Қазақстан облыстық полиция департаментіне сілтеме жасап.

Полиция күдіктіні анықтады. Оның заңды өкілдерінің қатысуымен жауаптар алынып, оқиғаның барлық мән-жайын анықтау мақсатында кешенді тергеу шаралары басталды.

"Оқиғаны құқық қорғау органдарына дер кезінде хабарламағаны үшін, сынып жетекшісі мен мектеп директорына қатысты іс-құжаттар Атырау облысы бойынша білім сапасын бақылау департаментіне жолданды", - дейді полицейлер.

Ал құқық бұзушылыққа жол берген жасөспірім есепке алынды. Оған қатысты жинақталған іс-құжаттар кәмелетке толмағандардың ісі жөніндегі комиссияда қаралатын болады.

Айта кетері, бұл оқиға "Тағылым" атты жеке меншік мектепте болған. 11-сынып оқушылары сөзге келіп қалады. Сол кезде бір қызды құрбылары итеріп жіберген. Ол құлап, басынан жарақат алды.