Атырауда алғаш рет халықаралық киберспорт турнирі өтуде

Атырау облысы әкімдігінің қолдауымен, «Қазақтелеком» АҚ серіктестігімен және Қазақстан Киберспорт федерациясының ұйымдастыруымен халықаралық «Atyrau CyberCup 2025» киберспорт турнирі өтіп жатыр, – деп хабарлайды Өңірлік коммуникациялар қызметі.

Іс-шараның ашылуында Атырау облысы әкімінің орынбасары Жасұлан Бисембиев сөз сөйлеп, қатысушыларға сәттілік тілей отырып, киберспорт – тек ойын ғана емес, ол логикалық ойлау, жылдам шешім қабылдау және командалық жұмысты дамыту құралы екенін атап өтті. Осындай жарыстар жастардың IT саласына қызығушылығын арттырып, цифрлық бағыттағы жаңа буынды қалыптастыруға ықпал етеді деді ол. Бұған дейін осындай ірі турнир көршілес Ресейдің Татарстан өңірінде өтсе, келер жылы елімізде Астана қаласында өтеді деп жоспарланып отырғанын да хабарлады облыс әкімінің орынбасары.  

Биылғы турнирге «Counter-Strike» және «Dota 2» ойын түрлерінен барлығы 167 команда қатысуда. Ал финалдық кезеңге төрт үздік топ жолдама алады. Ойындар 5x5 форматында өтуде. Бұған дейін турнирдің онлайн кезеңінде «PUBG Mobile» ойыны бойынша финалдық бәсеке ұйымдастырылған еді.

Жарысқа Орталық Азия елдерінен — Қазақстан, Өзбекстан, Қырғызстан, Түркіменстан және Тәжікстаннан ойыншылар қатысып отыр. Олардың жалпы саны 1300-ден астам. 

Қазақстан Киберспорт федерациясының спорттық менеджері Бейбарыс Серіковтың айтуынша, бүгінгі финалда «Counter-Strike» және «Dota 2» бойынша Қырғызстаннан бір және Қазақстаннан үш команда бақ сынайды. Жалпы жүлде қоры 10 миллион теңгені құрап, ол үш номинация бойынша үлестіріледі.

Бүгін, 16:44