Атырауда Даму Бала екі жылдан бері үйірмелерге жазылу мүмкіндігін шектеп отыр

«Даму Бала» бағдарламасы бойынша ваучерлер екі жылдан бері қолжетімді еместігі анықталды. Бағдарлама толық көлемде жұмыс істемейді, ал студиялар мен секциялар балалар санының азайғанын және іске қосылатын уақыттың белгісіз екенін айтып отыр.

«Біз бес рет облыс әкімдігіне жүгіндік. Сауал көп, бірақ нақты жауап жоқ. Тегін орындар күтіп жүрген көпбалалы ата-аналар бар», – дейді спорттық және шығармашылық секциялардың қызмет көрсетушілері. Олардың сөзінше, бағдарламаға қаржы қарастырылған, бірақ жүйе жабық, себептері түсіндірілмей отыр.

Ваучер – мемлекеттік бағдарлама арқылы баланың тегін үйірмеге баруына мүмкіндік беретін жолдама. Қызмет көрсетушілердің айтуынша, Атырауда шығармашылық бағыттағы үйірмелер екі жыл, ал спорт бағыттары бір жылдай уақыттан бері жұмыс істемейді. Балалар саны азайып, педагогтар жүктемесіз қалуда, орталықтар шығынға жұмыс істеуге мәжбүр. Ал екінші тарап – ата-аналар заңда қарастырылған үйірмелерге балаларын жаздыра алмай, ұзын-сонар кезекте тұр.

Секция жетекшілері ай сайын «жақын арада іске қосылады» деген уәде еститіндерін, бірақ жағдай өзгермейтінін айтады. Бұрын бала екі үйірмеге қатыса алса, қазір тек біреуіне ғана рұқсат беріліп отыр. Олардың пікірінше, бұл балалардың таңдауын шектеп, даму мүмкіндіктерін азайтады.

Өңірде пайда болған жаңа талаптар қосымша қиындықтар туындатып отыр. Әңгіме аумақтың көлеміне қойылатын жоғары талаптар, санитарлық және антитеррористік нормалар, сондай-ақ салалық құжаттарда жоқ жабдықтар тізімдері туралы болып отыр. Олардың айтуынша, мұндай талаптарды жеке студиялардың орындауы мүмкін емес

Бұған қоса, жеке мектептердегі бәсекелестік те әсер етуде. Бірқатар білім беру мекемелері өз үйірмелерін ашып, балаларды ең алдымен соларға жазылуға шақырады. Соның салдарынан балалар бұрынғы орталықтардан кетіп, секциялар аудиториясынан айырыла бастаған.

Мәселе республикалық деңгейге шықты. Қызмет көрсетушілер Қазақстан Президенті Қасым-Жомарт Тоқаевқа, Атырау облысының әкімі Серік Шәпкеновке, Мемлекеттік кеңесшіге, Бас прокуратураға және Қаржы министрлігіне хат жолдады. Олар қазіргі пилоттық жобаны тиімсіз деп тануды, өңірде енгізілген негізсіз талаптарды алып тастауды, бұрынғы жанбасылық қаржыландыру жүйесін қайтаруды, ваучерлерді автоматты түрде таратуды және барлық өңірлер үшін бірыңғай ереже қабылдауды сұрайды.

Биыл Атырауда қызмет көрсетушілер бұрынғы Damubala.kz жүйесінен жаңа Lira платформасына ауыстырылғаны белгілі болды. Олардың айтуынша, бұл платформа толық дайын емес, қолайсыз және айқын емес.

«Мемлекеттік портал мен жүйе үнемі өзгеріп тұрады. Бізбен ештеңе келісілмейді. Келіспесек, қаржыландыруды мүлде тоқтатуы мүмкін дегенді меңзейді», – дейді қызмет көрсетушілер.

Әлеуметтік кәсіпкер және инновация, спорт және шығармашылық оқыту орталығының жетекшісі Айгерім Ракимбаева бір жылдан астам уақыт бойы шамамен жүз елу баланы, соның ішінде ерекше балаларды да тегін оқытып жүргенін айтады. «Бұрын біз “Даму Бала” бағдарламасымен жұмыс істедік. 2025 жылдың маусымынан бастап бізді Lira платформасына ауыстырды. Бізден ешкім сұраған жоқ. Жай ғана “Даму Бала” тендерде жеңілгенін, енді жаңа сайтқа өтуге міндетті екенімізді айтты», – дейді ол.

Оның сөзінше, №204 қаулыдағы пилоттық жүйе деген желеумен мемлекеттік шығармашылық және спорттық тапсырыс жүйесін қайтадан мемлекеттік нысандардың өзіне беріп жатыр. Қызмет жеткізушілер қатарына спорт мектептері, оқушылар үйлері мен шығармашылық орталықтары енгізілген. Ал олар онсыз да жалдау ақысы, жалақы және коммуналдық шығындар бойынша субсидия алады.

«Бұл бәсеке емес. Бұл – теңсіздік. Бізге мектептер секілді кеңістікке, жабдыққа, өртке қарсы және санитарлық нормаларға қатысты талап қойылды. Жеке орталықтардың мұндай талаптарды орындауы мүмкін емес», – дейді ол.

А. Ракимбаева пилоттық жоба қабылданса, жүздеген үйірме жабылып, балалар сабаққа қол жеткізе алмай қалуы мүмкін екенін ескертеді.

Ол қызмет көрсетушілер митингке шықпайтынын, бірақ бірігуді маңызды деп санайтынын айтты: «Егер әрқайсымыз өз үнімізді білдірсек, бізді елейтіні сөзсіз. Бүгін шешіліп жатқан мәселе – тек бизнес емес, балалардың болашағы. Үнсіз қалсақ, ертең бізді жоқ қылуы мүмкін. Біріксек, бізді тыңдайды».

Қызмет көрсетушілер облыстық және республикалық органдардың ресми жауабын күтіп отыр. Облыс әкімдігінің баспасөз қызметі жағдайға түсініктеме беруге дайын екенін хабарлады. Күтеміз.

Айнұр САПАРОВА

Бүгін, 12:29