Атырауда ГСК жобасы бойынша форум өтті: қазақстандық қамту 90% ға жетпек

Газ сепарациялық кешен (ГСК) жобасы шеңберінде жергілікті қамтуды арттыруға арналған форум өтті. Шараны “KMG PetroChem” ЖШС Tecnimont, Consolidated Contractors Company (CCIC) және PetroCouncil қауымдастығымен бірлесіп ұйымдастырды. Форумға отандық өндірушілер мен жеткізушілер, мемлекеттік органдар және салалық бірлестіктерден 400-ге жуық адам қатысты.

Бір күн бұрын кешеннің алғашқы қадасы қағылып, жобаны іске асырудың белсенді кезеңі ресми басталған еді. Атырау облысы еліміздің мұнай-газ және мұнай-химия орталығы ретінде ірі индустриялық жобаларды жүзеге асыруға қажетті инфрақұрылыммен қамтамасыз етіп келеді.

Облыс әкімі Серік Шәпкенов форумда қазақстандық қамтуды арттырудың маңызын атап өтті: «Қазақстанда шығарылатын өнімдер мен көрсетілетін қызметтер газ сепарациялық кешен жобасында барынша пайдаланылуы тиіс. Бұл біздің біліктілігіміздің жоғары деңгейдегі жұмыстарды атқаруға жеткілікті екенін дәлелдейді. Президенттің тапсырмасы бойынша басты міндетіміз – жергілікті бизнестің бәсекеге қабілеттілігін күшейту», – деді ол.

Жобаның негізгі басымдықтарының бірі – жергілікті қамтуды дамыту. Құрылыс жұмыстарының қызған шағында (2026–2027 жж.) 3 500-ге дейін уақытша жұмыс орны ашылады. EPC-шарт аясында құрылыс-монтаж жұмыстарындағы қазақстандық қамтуды 90%-ға жеткізу көзделіп отыр. Негізгі субмердігерлер ретінде отандық компаниялар тартылмақ.

“KMG PetroChem” ЖШС басқарма төрағасы Диаз Диянов қазақстандық компаниялардың үлесін арттыру стратегиялық міндет екенін атап өтіп, мердігерлер мен нарық арасындағы тікелей диалогтың маңызын айтты. Форум барысында CCIC жергілікті кәсіпорындармен қадалар мен инертті материалдарды жеткізу, уақытша жұмыстарды орындау, металл конструкцияларын дайындау және жобалау-қадағалау қызметтерін көрсету бойынша ынтымақтастық туралы меморандумдарға қол қойды.

Форум алаңы инвесторлар, EPC-мердігерлер мен отандық бизнес арасындағы жүйелі диалогтың жалғасы болды. ГСК жобасы “Теңізшевройл” ЖШС-імен ынтымақтастықта, Атырау облысы әкімдігі мен KazService, “Атамекен”, KazEnergy, IMBC және PetroCouncil салалық бірлестіктерінің қолдауымен жүзеге асырылуда.

Бүгін, 15:07