Атырауда мемлекеттік балабақша қызметкерлері 3 айдан бері жалақы алмаған

Салдарынан қызметкерлер тіпті дәрігерлерге қарала алмай отыр. Олардың сөзінше, балабақша әр қызметкерге шамамен 1 миллион теңге берешек.

«Несиемізді төлей алмай отырмыз. Отбасымыздың тұрмыс-тіршілігіне қажетті төлемдер мен қызметке де ақша жоқ. Ал басшылық үндеместің ойынын ойнап отыр. Өзімізге міндеттелген жұмыстың барлығын істейміз, сондықтан еңбекақымызды толық төлеп, үстемеақысын қосып берсін», - деді балабақша қызметкері Айгүл Шаймарданова.

Мәселе елде енгізілген ваучерлік жүйеге байланысты туындап отыр. Бұл мектепке дейінгі білім беру мекемесі де осы жүйеге көшкен. Ваучерлік жүйеге сәйкес мекемеге мемлекет тарапынан ақша балалардың келуіне балабақшаға келген күніне байланысты төленеді. Білім беру басқармасының өкілдері шілде айынан бастап балабақшаның кірісі азайғанын айтты. Ал қызметкерлер болса басшылық бар қаржыны қайда жеткізерін білмей, кішкентайлардың тамағынан үнемдеуге кірісті дейді.

«Біздің балабақшаны өзге ұйыммен салыстыруға келмейді. Мұнда балалар қонады. Балаларға құнарлы тамақ берілу керек. Қазіргі уақытта тәрбиеленушілерге беріліп жатқан астың құнары азайып кетті. Шындықты айтып шырылдасақ басшылық артымыздан қалмай, бізге қарсы шығады», - деді балабақша қызметкері Әлия Тәженова.

Атырау облыстық білім беру басқармасындағылар мәселенің мән-жайынан хабардар. ҚР Оқу-ағарту министрлігіне №8 «Ақбота» санаторий-бөбекжай-балабақшасы мен тіл кемістігі бар балаларға арналған №20 Алтынбалық балабақшасын ваучерлік жүйеден босату туралы хат жолдаған.

Бүгінде ваучерлік жүйе арқылы қаражат «Қаржы орталығы» АҚ-нан тікелей балабақшаға аударылып отыр.

«Атырау қаласындағы 47 мемлекеттік және 128 жекеменшік балабақша шілде айынан бастап ваучерлік жүйеге көшірілді. Мемлекет басшысының тапсырмасына орай «Ақша баланың соңынан ереді» қағидаты бойынша Атырау қаласында жұмыс жүріп жатыр. Бұл жүйенің мақсаты – сапа, ашықтық және бәсекелестік. Қазіргі уақытта балабақша қызметкерлерінің жалақысын есептеп, төлеу бойынша облыс әкімінің қаулысы дайындалып жатыр. Жуырда олардың айлығы берілетін болады»,- деп жауап қатты Атырау облыстық білім беру басқармасының бас маманы Гүлсім Гилманова.

Еңбек инпекциясына шағым екі апта бұрын түссе де, ондағылар зерделеуге енді ғана кірісіпті. Балабақша басшылығына айыппұл салынады деп отыр.

Айта кетейік, бұған дейін Атыраудағы балабақшаларда қаржы тапшылығы туындағаны хабарланған болатын.