Атырауда республикалық Махамбет оқулары өтті

Атырауда өр рухты ақын, дәулескер күйші, баһадүр батыр Махамбет Өтемісұлының шығармашылығын насихаттауға арналған республикалық «Махамбет оқулары» өтті.

Байқауға еліміздің әр өңірінен 100-ге жуық оқушы қатысты. Олар 5 бағыт бойынша бақ сынады.

«Ұлы арман» номинациясында қатысушылар Махамбет шығармаларын арқау етіп, иллюстрациялық суреттер салды. «Ел құтқарар ер едім…» бағыты бойынша жас өрендер ақынның өлеңдерін жатқа оқыды, «Шашақты найза, шалқар күй» сайысында жас күйшілер Махамбет күйлерін орындаса, «Тартынбай сөйлер асылмын…» номинациясы бойынша жас ақындар сынға түсті. Ал «Біз неткен ер, неткен ер!..» бағыты бойынша оқушылар ғылыми жобаларын ұсынды.

Назгүл Орынғали, байқауға қатысушы:

- Мен ғылыми жобада ең әуелі Махамбетке емес, Махамбеттің өмірбаянын барлығы білетіндіктен, осы Махамбеттің әулеті, яғни оны Махамбет еткен тұлғалар жайлы, ізгі тұлғаларды жазып өттім. Яғни Махамбеттің Махамбет болуында роль атқарған әкесі Өтеміс өте ықпалды тұлға болған. 

Нұрислам Әлімбай, байқауға қатысушы:

- “Шашақты найза, шалқар күй” атты номинацияда қатысқан болатынмын. Бұл негізі оңай сайыс болған жоқ. Күйлердің түр-түрін зерттеуге, оның ішінде тарихын зерттеуге өз үлесімді қостым. 

Байқау биыл үшінші рет өткізіліп отыр. Махамбет Өтемісұлының шығармаларын насихаттап, жас ұрпаққа отансүйгіштік пен қайсарлықты дәріптеуде мұндай іс-шаралардың маңызы зор,- дейді ұйымдастырушылар.

Марат Әбуов, облыстық білім басқармасының басшысы:

- Жалпы жылдан жылға қатысушылардың саны артуда. Әлемде өзінің ұлты үшін күрескен қайраткерлердің қатарында теңдей тұратынын, бірегей екенін біздің қазақ халқы, оның ішінде жасөспірімдер мен оқушыларымыз біліп өсуі керек. Сол себепті біздің балаларға тәрбие, патриоттық, ұлттық құндылықты дәріптеп жатырмыз.

Жүзден жүйрік шыққан оқушылар арнайы дипломдармен және қаржылай сыйлықпен марапатталды. Сондай-ақ байқау аясында әр облыстан келген оқушылар Атыраудың тарихи орындарын аралап, өңірдің мәдени мұрасымен танысты.

Асланбек Шығыр, Амантай Мәтенов