Аудан әкімдерін сайлау мәселесін әлі де зерделеу қажет Мәжіліс депутаттары

«AMANAT» партиясы фракциясының мүшелері,  Мәжіліс депутаттары Ерлан Саиров пен Мархабат Жайымбетов Премьер-Министр Олжас Бектеновке, Орталық сайлау комиссиясының төрағасы Нұрлан Әбдіровке аудан әкімдерінің сайлауына қатысты депутаттық сауал жолдап, оларды мәслихат арқылы сайлауды ұсынды, – деп хабарлайды Aykin.kz.

Ерлан Саировтың айтуынша, соңғы 5 жылда айтарлықтай ірі қадамдар жасалды. Мысалы, әрбір жексенбі сайын ауыл, аудан, қала әкімдерінің сайлауы өтіп жатыр. Дегенмен оның да  пысықтайтын тұстары барын жеткізді.

–  Әлі де сайланып жатқан ауыл әкімдерінің құзыретін, олардың әлеуметтік-экономикалық мүмкіндігін реттеу қажет екеніне көзіміз жетіп отыр. Заң аясында ауыл әкімдерінің құзыретін әлі де кеңейтуіміз қажет. Төртінші бюджетті қалыптастыру тетіктерін заңмен пысықтауымыз тиіс. Бүгінде аудан, қала әкімдерін пилоттық форматта сайлауға кірісіп, 52 әкім сайланған. Бірақ бұл тәсілдің тиімділігі әлі де сараланбаса керек. Ол жетілдіруді талап етеді. Тіпті, сайланған аудан әкімдерінің арасында бір жылға жетпей жұмысынан кеткендер де бар,  – деді Мәжіліс депутаты Ерлан Саиров. 

Әріптесінің сөзін қолдаған Мархабат Жайымбетов өзі бұрын қала мен аудан әкім болғандықтан, бұл мәселемен жақсы таныс екенін айтты. Депутаттың айтуынша, ол жақында ғана бірқатар ауданды аралап, елдің тыныс-тіршілігімен танысқан. Сапар барысында депутат аудан әкімдерін тікелей сайлау жүйесінің әлі де пысықтауды қажет екеніне көз жеткізген.

«Ауданға бөлінетін қаржы мәселесін реттеуге тиіспіз. Ал аудан әкімдерінің құзыреті бойынша бірнеше маңызды заңға өзгеріс енгізу қажет. Мысалы, білім беру саласының шығыны облыстық бюджетте қалып, кірістері аудан бюджетінде. Қазір аудан әкімдерінде құзырет аз, жауапкершілік көп. Қазір аудан әкіміне білім, денсаулық ветеринария саласы, жұмыспен қамту орталықтары бағынбайды. Ең бастысы, ауыл әкімдері  сайлауының бір 5 жылдық кезеңін күтіп, ауылдық сайланған әкімдердің тәжірибелі корпусын даярлау маңызды. Сонда ғана саяси, ең бастысы кәсіби кадрлар резерві қалыптасады. Сондықтан оған әзірше уақытша тоқтау қойып, жан-жақты пысықтағанымыз жөн», – деді ол.

Бұған қоса, Ерлан Саиров аудан әкімдерінің сайлауына қыруар қаражат кететінін алға тартты.

«Тек биылдың өзінде 6 аудан әкімі мен 1 облыстық маңызы бар қала әкімінің сайлауы өтті. Осының өзіне мемлекеттік бюджеттен 1 миллиард теңгеге жуық қаражат жұмсалды. Жергілікті өзін-өзі басқару, мемлекеттік қызмет, сайлау, өңірлерді дамыту туралы көптеген заңдарға қажетті нормаларды енгізгенше, аудан деңгейіндегі әкімдердің тікелей сайлауына тоқтата тұруды ұсынды», – деді депутат.

Өз сөзінде ол ауылдық округ әкімдерінің сайлау жүйесін енгізу бес жыл бойы кезең-кезеңімен жүргізіліп келе жатқанын айтып, аудан әкімдерін сайлау мәселесінде жүйелі әрі жан-жақты зерделенген тәсіл қажет екеніне тоқталды.

Сондай-ақ депутаттар осынау маңызды мәселеде асығыстық танытуға болмайтынына назар аударып, ұсыныстың сайлау процесін шектеуге емес, керісінше халықтың сайлауға деген сенімін арттыруға бағытталған.