Балық өсіруге қолдау көрсетіледі

Биылдан бастап бекіре өсіретін шағын фермаларға субсидия беріледі. Бұған дейін жылдық өндіріс қуаты 45 тонна болатын балық шаруашылықтары ғана жәрдемақы алатын. 

Бүгінде бұл меже 25 тоннаға түсірілді. Яғни шағын көлемде бағалы балық өсіретіндер де енді субсидияға үміт арта алады. Осындай мемлекеттік қолдау саланың дамуына қаншалықты септігін тигізеді. 

Қостанай облысындағы жалғыз бекіре фабрикасы 2024 жылы ашылды. Жылдық қуаттылығы 25 тонна. Қазіргі кезде суға толы 16 бассейінде уылдырығынан өсірілген балықтар ойнақ салып, шоршып жүр. Биыл кемі 15 тонна өнім өткізуді жоспарлап отыр. «Үкімет шешімімен субсидиялау шегі 40-тан 25 тоннаға төмендетілуі, біз сияқты шағын фермалар үшін зор мүмкіндік», - дейді шаруашылық басшысы.

Валентин Ищенко, бекіре фермасының басшысы:

- Әрине 25 тоннаға азайтылғаны бізге жақсы. Басқаларды да ынталандырады. Инвестициялық субидия алсақ, дәл осындай қосымша кәсіпорын саламыз. Құрал-жабдықтар аламыз. Өндірісті кеңейтеміз.

Тауарлы балыққа айналғанға дейін бекірені бағып-қағудың машақаты аз емес. Қорегі, суы, дәрі-дәрмегі бар, шығыны да шаш етектен. Осының бәрі мемлекет тарапынан субсидияланады.

Дастан Сәмен, Облыстық бәсекелестікті қорғау және дамыту департаментінің басшысы:

- Біз 25 тоннаны есептегенде 1 млрд теңгенің үстінде ақша салу керек сол үшін, ал 45 оданда көп. Сондықтан орта және шағын бизнеске ол ауыр тиеді. Сондықтан осындай шешім қабылданды.

Облыс бойынша қазіргі кезде 187 су айдыны жеке пайдаланушыларға бекітіліп берілген. Соның 56-сы тауарлы балық өсірумен айналысады. Олар былтыр 750 тонна балық өндірген. Мемлекеттік көмек-қолдаудың артуымен бұл кәсіпке қызығушылық танытушылар көбейіпті.

Береке Тоғаев, Тобыл-Торғай облысаралық бассейндік балық шаруашылығы инспекциясының басшысы:

- Субсидиядан басқа қазіргі таңда кәсіпкерлерге жеңілдетілген несиелер қарастырылып отыр. Атап айтсақ, 2,5 пайызбен бюджеттік несие, бұл жаңадан балық өсіру шараушылықтарын салуға немесе кеңейтуге, өңдеуге қарастырылған. Тағы да қаражат айналымын толықтыру мақсатында бес пайыздық жеңілдік несие қарастырылып отыр. 

Биыл қосымша 40 су айдыны балық шаруашылығын жүргізуге кәсіпкерлерге бекітіліп беріледі. Оның бәрі жақында «Е-қазына» электрондық порталы арқылы аукцион тәсілімен өткізіледі.

Авторлары: Мағауия Қалиев, Сергей Трахтенберг