Бас прокуратурада Еуропалық Одақ өкілдерімен отырыстар өткізілді

Биыл  18-19 наурызда Астанада «Қазақстан Республикасы – Еуропалық Одақ» Адам құқықтары жөніндегі диалог пен Сот төрелігі мен құқықтық тәртіп жөніндегі кіші комитеттің кезекті отырыстары өтті, – деп хабарлайды Aikyn.kz.

Қазақстандық тараптан Бас прокуратура, Сот әкімшілігі, Ұлттық қауіпсіздік комитеті, Қаржылық мониторинг және Мемлекеттік қызмет істері агенттіктерінің, Адам құқықтары жөніндегі ұлттық орталықтың, Сыртқы істер, Әділет, Ішкі істер, Еңбек және халықты әлеуметтік қорғау, Мәдениет және ақпарат, Денсаулық сақтау және Оқу-ағарту министрліктерінің өкілдері қатысты.

Кіші комитеттің қазақстандық бөлігінің тең төрағасы, Қазақстан Республикасы Бас прокурорының орынбасары Асхат Жұмағали осы жылғы 15 наурызда республикалық референдумда қабылданған Конституцияның адам құқықтарын қорғау жүйесін нығайту тұрғысынан негізгі жаңашылдықтарын баяндады.

Заң үстемдігін, әділеттілікті және барлығының заң алдындағы теңдігін қамтамасыз етуге бағытталған қоғамда құқықтық тәртіп идеологиясын ілгерілету тұжырымдамасын іске асыруға ерекше назар аударылады.

Кіші комитет құқық қорғау және сот жүйелерін дамытуды, қылмыстық және азаматтық істердегі халықаралық ынтымақтастықты, заңсыз көші-қонға, терроризмге, есірткі қылмысына, көлеңкелі экономикаға және сыбайлас жемқорлыққа, адам саудасына қарсы күрес сияқты жаһандық қауіптерге қарсы тұруды, сондай-ақ Қазақстанның қылмыстық іс жүргізу саласындағы еуропалық конвенцияларға қосылуын талқылады.

Тараптар, БҰҰ және ЕҚЫҰ платформаларын қоса алғанда, көпжақты халықаралық платформалар шеңберіндегі өзара іс-қимылды талқылап, адам құқықтары, сот төрелігі мен құқықтық тәртіп бағытында тәжірибе мен озық тәжірибелермен алмасуды жалғастыруға қызығушылық танытты.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.