Бастапқы жарнасы 5% және 10% мөлшерлеме: Қазақстанда жаңа ипотекалық бағдарлама іске қосылды

Батыс Қазақстан облысының жастарына арналған «Жайық жастары» аймақтық бағдарламасы аясында 106 жас маман жаңа пәтерге қоныстанды, – деп хабарлайды Aikyn.kz сайты.

Пәтер иелері қоғам үшін маңызды қызмет атқаратын мамандар: дәрігерлер, мұғалімдер, мәдениет саласының өкілдері, спортшылар мен жаттықтырушылар, коммуналдық кәсіпорын қызметкерлері, құқық қорғаушылар, құтқарушылар, журналистер және “Қазпошта” қызметкерлері болды.

Қаржылай қолдау

Бағдарламаны жүзеге асыру үшін облыс әкімдігі бұған дейін 1,8 миллиард теңге бөлген. Сол қаржы есебінен «Отбасы банк» қолжетімді несиелер ұсынды.

«Еліміздің жастарына, әсіресе қоғамға қызмет етіп жүрген азаматтарға қолдау көрсету — біздің басты міндетіміз. Олар емдейді, оқытады, қауіпсіздікті қамтамасыз етеді, мәдениетті сақтап, инфрақұрылымды дамытады. Сондықтан біз “Жайық жастары” бағдарламасын жалғастыру үшін қосымша 1,6 миллиард теңге бөлеміз. Жақын уақытта тағы 90-нан астам жас жаңа пәтер алады»,-деді «Отбасы банк» Батыс Қазақстан облыстық филиалының директоры Нұржан Қалышанов.

Бағдарлама шарттары

Өтінімдер 2025 жылдың 20-31 қазаны аралығында қабылданады.

Негізгі талаптар:

Несие мөлшерлемесі  жылдық 5% (ЖТСМ 5,2%-5,7%).

Максималды сома 18 миллион теңге.

Бастапқы жарна 10%.

Несиелеу мерзімі 19 жылға дейін.

Қатысушының жасы35 жасқа дейін (қоса есептегенде).

Қатысушы және отбасы мүшелері Батыс Қазақстан облысында тұрақты тіркеуде болуға тиіс.

Соңғы бір жылда ресми еңбек өтілі мен зейнетақы жарналары болуы қажет.

Қатысушы мен отбасы мүшелерінің соңғы 5 жылда тұрғын үй иелігінде болмауы керек.

Жер учаскесінің, жатақханадағы немесе саяжай үйінің болуы қатысуға кедергі емес.

Тұрғын үйді қайдан алуға болады?

Бағдарлама аясында баспана бірінші және екінші нарықтан сатып алуға болады. Сонымен қатар “Қазақстан тұрғын үй компаниясы” АҚ кепілдігі бар пайдалануға берілген немесе салынып жатқан үйден де пәтер алуға мүмкіндік бар.

Қатысушыларды іріктеу

Льготалық несие алу мүмкіндігі жинаған балл санына байланысты болады.
Балл есептеу кезінде:

неке ұзақтығы,

балаларының болуы,

әлеуметтік осал топқа жатуы,

«Отбасы банктегі» жинақтарының болуы сияқты факторлар ескеріледі.

Тізім жасалғаннан кейін қатысушыларға несие алу бағыттамасы беріледі. Одан кейін «Отбасы банк» олардың төлем қабілеттілігін тексеріп, несие рәсімдейді.