Батыс Қазақстанда жүк көліктерінің кезегі: электронды бронь жұмыс істемей тұр

Шымкенттік жүк көлігінің жүргізушісі Батыс Қазақстан облысындағы «Тасқала» автомобиль өткізу пунктінде бейберекеттік пен кептеліс болып жатқанын айтып, видеоүндеу жариялады, деп хабарлайды «Уральская неделя».

Видеода жүк көліктерінің бірнеше шақырымға созылған ұзын-сонар кезегі көрсетілген. Жүргізушінің айтуынша, кезекте тұрған көліктердің басым бөлігі электронды кезекке алдын ала бронь жасамаған. Алайда жалпы кептелістің салдарынан бұл қызметке ақы төлеген жүргізушілер де өте алмай отыр.

«Алдын ала электронды кезекке бронь жасап, ақысын төлегенім не үшін, егер мені бәрібір жалпы кезекте тұруға мәжбүрлесе? Броньдалған уақытыма үлгеру үшін кептелісті қарсы жолақпен айналып өтпек болғанымда, полиция қызметкерлері маған айыппұл салды», – деп наразылық білдірді жүргізуші.

Қазақстанның автомобиль өткізу пункттерінде CarGoRuqsat электронды кезек цифрлық платформасы 2025 жылы енгізілді. Мемлекеттік кірістер комитетінің мәліметінше, жүйе ашықтықты қамтамасыз ету, сыбайлас жемқорлықты жою және шекарадағы кептелістерді болдырмау мақсатында құрылған.

Жүргізушілерге 1 АЕК көлемінде ақы төлеп, шекарадан өтетін уақытты алдын ала броньдау және жалпы кезекті айналып өтіп, жедел өту мүмкіндігі берілуі тиіс еді.

Алайда Батыс Қазақстан облысындағы өткізу пунктінде қалыптасқан жағдай жүйенің іс жүзінде әлі де іркіліспен жұмыс істейтінін және елдегі барлық шекара өткелдерінде толыққанды іске қосылмағанын көрсетеді.

Сонымен қатар бұл қызмет мемлекетке қомақты табыс әкеліп отыр. CarGoRuqsat жүйесінің өз мәліметіне сәйкес, биыл жүк көліктерін электронды тіркеуден бюджетке шамамен 32,2 миллиард теңге түскен.

Жүк көліктерінің жүргізушілері Мемлекеттік кірістер комитеті мен құқық қорғау органдарын шекараға апаратын жолдардағы тәртіпті ретке келтіруге және кезекті ресми түрде броньдаған көліктердің басымдықпен өтуін қамтамасыз етуге шақырады.

Бүгін, 17:02