Баянауыл ұлттық паркінің құрылғанына 40 жыл толды

Ұлттық парк 1985 жылы 12 тамызда Павлодар облысы Баянауыл ауданында құрылған. Бірнеше орманшылықтан тұрады. Өзге ерекше қорғалатын табиғи аумақтарға қарағанда мұнда табиғи ескерткіштер жиі кездеседі. Парк аумағында 24 археологиялық табиғи ескерткіш орналасқан — Кемпіртас, Қоңыр әулие үңгірі, Драверт үңгірі, тастағы көне жазулар, Саймантас, Көгершінтас, Атбасы тасы, Найзатас жартасы және т. б. Бұдан бөлек, тарихи орындар да молынан шоғырланған.

Фото: Баянауыл ұлттық паркі

Аумақта негізінен төрт су айдыны — Торайғыр, Біржанкөл, Сабындыкөл және Жасыбай көлі орналасқан. Бұл көлдердің барлығының суы тұщы. Соның ішінде Жасыбай көлінің айналасы демалыс аймағына айналған.

Фото: Баянауыл ұлттық паркі

Ұлттық парктің орманмен көмкерілген жерлерінің аумағы — шамамен 19076 гектар. Мұнда 552 өсімдік түрі бар. Оның бесеуі Қазақстан Республикасының Қызыл кітабына енгізілген. Атап айтқанда, көктем жанаргүлі, ашық құндызшөп, қызғалдақ, қара қандыағаш, боз селеу. Мұнда сондай-ақ жануарлардың 45, құстардың 11, балықтардың 13 түрі кездеседі.

Фото: Баянауыл ұлттық паркі

Баянауыл курорттық аймағында бір демде 5 мың адам демала алатын 50-ден аса туристік нысан бар. Таулы өлкеде 13 негізгі туристік маршрут және 68 көрнекі орын жұмыс істейді. Бұл маршруттарда демалушыларға барлық жағдай жасалған — арнайы демалатын орын, бақылау алаңдары жабдықталған. Жасыбай демалыс аймағына бір жазда шамамен 120 мың адам келеді.
Ұлттық парк атаулы датаға оарй салтанатты іс-шара өткізіп, мекемеде ұзақ жыл еңбек етіп келе жатқан азаматтарыд марапаттады. Парк басшысы Алмас Жұмашевтың айтуынша, мұнда 11 өрт сөндіру кешені, 6 автокөлік, 14 патрульдік кешен, 8 трактор бар. Жалпы саны 111 адам жұмыс істейді.

Фото: Баянауыл ұлттық паркі

Бұған дейін Мәжіліс депутаттары Баянауылға ерекше мәртебе беру керек деген мәселе көтерген.