Бедеулікті емдеудің ең тиімді жолы

Қазір елдегі технологиялар мен заңдық нормалар, тек отбасылық жұптарға ғана емес, жалғызбасты адамдарға да донорлық ұрық немесе суррогатты ана қызметін пайдаланып, балалы болуға мүмкіндік бар. Бұл осы бағытта медициналық туризмді дамытуға сеп болды. Соңғы он жылда шамамен 150 мың жұп елдегі репродуктивті технологияларға жүгінген. Ал процедуралардың тиімділігі үш есе артып, 42%-ға жетті.

Балалы үй - базар. Баласыз үй - қу мазар. Қазақстанда әрбір алтыншы отбасы бедеулікке шалдыққан. Ерлі-зайыптылардың 20%-ы сәби болмағандықтан ажырасады. Дәл осындай қиын жағдайды бастан өткергендердің бірі - Гүлнар мен Сәкен. Олар үйленген соң төрт жылдай бала болмаған. Ажырасуға шақ қалғанда ерлі-зайыпты медицинаның көмегіне жүгінді. Бұл жұп бір емес, төрт рет экстракорпоральды ұрықтандыру жасатқан. Соның біреуі сәтті шықты.

Гүлнәр Иманқұлова, қала тұрғыны:

- Біздің жасымыз 39-40-та. Қосылғанда 27 жаста едік. Басында өзіміздің баламыз болды, бірақ Алланың бұйрығымен түсік тастадық. Содан кейін екі жылдай жүрдік емделіп, алайда болмады, бұйрық солай болды. Осылай ЭКО жасау арқылы бала сүйе аласыңдар деген үкім шығарғаннан кейін біз осы жолға кірістік. Алайда біз мемлекеттен қаржы алған жоқпыз. Жолдасымның арқасында, несие алу арқылы өзіміз бірінші жолды бастадық. Қиындау болды, әрине, кейде ажырассам ба деген де ой келді... көп нәрсе болды. Алайда ер адамның көмегі, осы кісінің сүйіспеншілігі маған "Біз жеңеміз!" деп айтты, маған ортақ бала болады деп айтты. Мен соған сендім, соның арқасында ұлды болдық. Қиыншылықтар көп болды. Ол баланы көтергенде ковид кезі еді. Десе де біз қорықпадық, мойымадық. Ұлымыз бар, қазір міне, 5 жасар. 

Бүгін ерлі-зайыптылар араға бес жыл салып, тағы да ЭКО жасатуға келді. Бұл жолғы процедураны арнайы қор қаржыландырады. 

Гүлнар Иманқұлова, қала тұрғыны:

- Ұрықтарды алды. Дайын, енді бүгін ұрықты салу күні. Бұйыртса бұдан кейін 2 апта күтеміз.... Алладан күтеміз, Алладан тілейміз.

Сакен Боканов, қала тұрғыны:

- Мен жолдасымды қолдауға келдім. Енді кішкене қобалжу бар. Бақытты отбасы болу үшін бір-бірін сыйлап жүргенге не жетсін деп ойлаймын. 

Жасанды жолмен ұрықтандыру - бүгінде дүниежүзі бойынша бедеулікпен күрестің ең тиімді жолы деп танылған. Алайда оның нәтижесі адамның жасына байланысты. Процедура кезінде эмбрионның жатырға жақсы бітіп кетуіне де осы фактор әсер етеді.

Алмас Ибрагимов, репродуктолог дәрігер:

- ЭКО бағдарламасының нәтижелілігі әйел адамның жасына тікелей тәуелді. Орташа есеппен алатын болсақ, 40% шамасында. Ал 35-жасқа дейінгі келіншектерде 50-60%-дан асады нәтижелілігі. Сондықтан жасырақ кезде емге жүгінген дұрысырақ.

Жалпы әлемде 10 млн-нан астам бала жасанды ұрықтандыру арқылы дүниеге келген. Қазақстанда мұндай сәбилердің саны 40 мыңға жуықтайды. Алайда бедеулікке шалдыққандардың бәріне бірдей денеден тыс ұрықтандыру қажет емес. Дәрігерлердің айтуынша, кейбір жұптар қарапайым ем-домнан кейін, тіпті психологпен сөйлескеннен кейін де табиғи жолмен бала көтереді. Бастысы уақыт созбай, маманның көмегіне жүгіну.

Авторлары: Ғазиза Мұхамеджанова, Асхат Қарақойшиев