Суды үнемдеудің тиімді жолы

Елімізде 2030 жылға дейін заманауи суару жүйелерімен 1,3 миллион гектар жер қамтылады.

Көрсеткіш суармалы жерлердің жалпы көлемінің 70%-ын қамтуға мүмкіндік береді. Бұл туралы орталық коммуникациялар қызметі алаңында Су ресурстары және ирригация министрлігінің өкілі хабарлады. Айтуынша, қазір ел аумағында ауыз су мен техникалық сумен жабдықтау, суару мақсатында 4800-ден аса жер асты суы пайдаланылады. Мемлекеттік баланста тәулігіне 43,2 млн текше метр пайдалану қорлары тіркелген. Оның ішінде тәулігіне 1,5 млн текше метрі ғана кәдеге жарап  тұр. Қазіргі таңда тіршілік нәрін үнемдеу бойынша кешенді жұмыстар қарқынды атқарылып келеді. Ел аумағында 4000-ға жуық жерасты суларын бақылаудың мемлекеттік желісі іске қосылған. Олар судың деңгейін, температурасын және сапасын бақылауға мүмкіндік береді.

Жайық Ерікұлы, ҚР Су ресурстары және ирригация министрлігінің жерасты сулары департаментінің директоры:

- Қазіргі уақытта ауыл шаруашылығы су ресурстарының ең ірі тұтынушысы болып табылады – жалпы су тұтынудың шамамен 65% құрайды. Суарудағы су үнемдеу технологияларын енгізу мәселелерін кешенді шешу мақсатында Министрлікке Ауыл шаруашылығы министрлігінің шаруаларға суармалы су қызметтерінің құнын, сондай-ақ суарудың су үнемдеу технологияларын енгізуге арналған шығыстардың бір бөлігін субсидиялау жөніндегі функциялары берілді. 2024 жылдан бастап ауыл шаруашылығы тауарын өндірушілерді су үнемдейтін суару технологияларына көшуге ынталандыру үшін негіз қаланды.