Бельгияның жоғарғы оқу орындарымен байланыс артып келеді

Корольдіктің жетекші білім ордасының бірі - Монс Университетінде отандасымыз сутегі энергетикасын дамытып жүр.

Жас ғалым көміртексіз, тиімділігі жоғары қуат көзін алуды зерттеуде. 

Сутегіні өндіретін әртүрлі технологиялар бар. Біз плазмалық технологияны қолданамыз. 

Асан Атырау облысы Амангелді ауданы Шортанбай ауылының тумасы. Бакалавриат, магистратура, докторантураны Әл-Фараби атындағы Қазақ ұлттық универсиетінде оқыған. Кейін Қазақ-Британ техникалық университетінде дәріс берген. Қазір Бельгиядағы Монс университетінің шақыруымен постдокторлық бағдарлама аясында ғылыммен айналысып жүр.

Асан Әбдірахманов, физик ғалым:

- Сутегі деген ол болашақтың энергия көзі деп аталады. Осы жерде сол сутегіні өндіруге арналған технологияны біз жетілдірумен айналысамыз.

Сутегі технологияларын дамыту бүкіл әлемнің энергетикалық стратегиясына кіреді. Бірақ оны қоршаған ортаны ластайтын көміртектік ізсіз өндіру өте маңызды. Қазақ ғалымы айналысып жатқан зерттеу сәтті жүзеге асса, болашақта баламалы энергетиканың қарқынды дамуына жол ашылмақ.

Рони Снайдерс, Монс Университетінің профессоры:

- Болашақта сарқылатын қазба отындарынан бас тартып, толығымен жасыл энергетикаға ауысатын күн алыс емес. Асанның Қазақстанда алған академиялық білімі бізге көп пайдасын тигізіп жатыр. Алдағы уақытта оны басқа да жобаларға тартқымыз келеді.

Монс Университетінің басшылық құрамымен және оқу орнына қарасты зерттеу орталығының өкілдерімен Қазақстанның Бельгиядағы елшісі кездесті. Басқосуда жоғары білім, академиялық ұтқырлық және қолданбалы ғылыми зерттеулер саласындағы ынтымақтастықты кеңейту жолдары талқыланды.

Роман Василенко, Қазақстан Республикасының Бельгиядағы Елшісі:

- Біз әріптестікті тереңдетуге мол мүмкіндік бар деп есептейміз. Болашақта тәжірибе алмасып, бірлескен филиалдар ашуға да болады деп ойлаймын. 

Филипп Дюбуа, Монс Университетінің ректоры:

 - Біздің есігіміз барлық қазақстандыққа ашық. Сонымен бірге жоғары оқу орындарыңызда біз туралы көбірек біліп, жаңа әріптестіктер орнатсақ деймін.

Келер айдан бастап Монс студенттері Қазақ ұлттық университетінде бір семестр оқып, тіл және өңіртану пәндерін меңгермек. Жас отандастарымыз өз кезегінде осында тілдер факультетінде білім алып жүр.

Диана Безверхая, студент:

 - Біз ағылшын тілін тереңдетіп оқып жатырмыз. Сондай-ақ жергілікті ортаға тез бейімделу үшін француз тілін де меңгере бастадық.

Асанның туған жерімен байланысы үзілген емес. Қазақстандық студенттерге онлайн дәріс оқиды, бірқатар ғылыми журналдармен жұмыс істейді. Елге оралған соң ол шетелде жинаған тәжірибесі негізінде отандық ғылыми лаборатория ашуды көздеп отыр.

Ғалымжан Қараманұлы