Күміске сұраныс артып келеді

Биыл әлемдік инвесторлардың жиғаны алтын, тергені күміс болды. Сұраныс  артқан соң, баға да асау аттай ұстатпай барады. Жылтыраған тас қауіпсіз активке айналды. 

Алайда жер бетінде алтын, күмістің қоры түгесіліп барады деп америкалық геологтар дабыл қақты. Ал, нарықта кейінгі апталарда бағаның сәл түскені байқалады. Бірақ бір-ақ күнде қайта көтерілуі әбден мүмкін. Алтынның қадірін бір білсе, осы білер, халықаралық шолушымыз Фариза Жанғанаевадан сұрайық. 

Алтынның бағалы бұйым екені белгілі. Десе де алпауыт компаниялар мен қарапайым халық үшін қазір күміс қолайлы инвестиция көзіне айналып отыр. 

Алтыннан арзан болса да, күмістің экономикадағы, ақша-несие саясатындағы дәрежесі басым. Жыл басынан бері бұл металлдың бағасы 73 пайызға өсіп, алғаш рет 50 долларлық шектен асты. Мұндай көрсеткіш кейінгі 45 жылда болмаған. Өткен аптада баға күрт өсіп, 54 доллардан асты. Қазір 0,5%-ға сәл түсіп,  шамамен 52 долларға саудаланып жатыр.

Қазір адамдар жай ғана болашақтағы ықтимал үзілістердің орнын толтыруға тырысып жатыр. АҚШ пен басқа да елдерде күміске баж салығы енгізілуі мүмкін деген қауіп қоймаларда металл қорларын көбейтуге әкелді. Бұл логистика мен жеткізу тізбегінде іркіліс болмас үшін алдын ала қор жинау әрекеті.

Шри Каргуткар, Sprott Asset Management компаниясының сарапшысы: 

- Саяси сарапшылардың пікірінше, АҚШ пен Испания арасындағы дағдарыс НАТО ішіндегі өзара сенім мен ынтымақтастыққа қауіп төндіреді. Испания сияқты мүше мемлекетке қарсы ашық сын мен экономикалық қысым альянстың үйлесімді жұмыс істеу қабілетін де төмендетуі мүмкін. Сонымен қатар, бұл жағдай АҚШ пен Еуропалық Одақ арасындағы дипломатиялық қарым-қатынасты шиеленістіріп, трансатлантикалық серіктестіктің тұрақтылығына кері әсер етуі де әбден ықтимал. 

Қазір әлем жасыл экономикаға көшу жолында. Бұл күміске сұраныс артпаса, кемімейді деген сөз. Мәселен, күміс жылу өткізгіш және оптикалық қасиетке ие. Ал бұл күннен қуат алу үшін таптырмас металл. Әр гигаватт қуаттағы фотоэлектрлік станцияларға шамамен 100 тонна күміс қажет. Тағы қосымша сұраныс аккумулятор өндірісі, оның ішінде авиация мен ғарышта қолданылатын күміс-мырыш батареялары үшін артатыны сөзсіз. Тағы бір маңызды сектор - электромобиль өндірісі. Былтыр электромобильдердің жалпы автомобиль өндірісіндегі үлесі 15%-ға жетті. Әсіресе Қытай тарапынан көрсеткіш жоғары. Оның үстіне жасанды интеллекттіні дамытуға басымдық берген сайын, электроника саласында күміске сұраныс жыл сайын 400–900 тоннаға артады. 

Алайда күміс қоры сарқылып барады. АҚШ Геологиялық қызметінің мәліметі бойынша, кейінгі 10 жылда кен өндіру сапасы 30%-ға төмендеген. Бұл дегеніміз күміс өндіру үшін жерді көбірек қазып оны өңдеу қажет.  Бұл өндіріс шығындарын едәуір арттырады. Мәселен, бір унция күміс өндіру үшін қазір көп көлемде тау жынысы өңделуі қажет. Бұл энергия шығынын, жұмыс күшін және уақытты көбейтеді. Әрі жер астында күміс мөлшерінің сарқылуы, өндіріс бағасын көтереді. Бүгінде күмістің орташа таза өзіндік құны унциясына $18,5. Егер баға осы деңгейден түсіп кетсе, шахталардың жабылу қауіпІ бар. Осы себепті америкалық геологтар күмісті "стратегиялық маңызды металл" ретінде танып, экономикалық және ұлттық қауіпсіздік үшін маңызды минералдар тізіміне енгізуді ұсынды. 

Күміс нарығында сұраныс пен ұсыныс арасында алшақтық байқалады.

Металлды өндіру және өңдеу көлемі оны тұтыну көлемінен айтарлықтай аз.