Қытайда гранфлюенсер танымалдығы артып келеді

Интернет жұлдыздарының жаңа буыны

Қартаю — өмірге деген қызығушылықты жоғалту емес. Қытайда егде жастағы адамдар цифрлық кеңістікті белсенді игеріп, артып келе жатқан интернет-экономиканың бір бөлігіне айналып келеді.

Олардың бірі — 80 жастағы атақты блогер Бэйхай ата. Ол мінсіз костюмдері мен тәртіпті өмір салты арқылы аудиторияның жүрегін жаулап алды. 2018 жылдан бері ол ұлымен бірге Douyin әлеуметтік желісінде (қытайлық TikTok нұсқасы) аккаунт жүргізіп келеді. Олардың отбасылық саяхаттар, нәзік стиль және күнделікті өмірдің жылы сәттері туралы видеолары 15,2 миллионнан астам жазылушының басын қосып, шамамен 300 миллион лайк жинаған.

@grandpa.is.here #CapCut #grandpa #fashion #fyp #style ♬ Ruff Ryders' Anthem - Re-Recorded - DMX

Аньхой өлкесінің тұрғыны, 56 жастағы зейнеткер Лю Цинмэй Бэйхай атаның үлгісі шабыт бергенін айтып, зейнеткерлік өмір, гүл өсіру, би және саяхат туралы қысқаша видеолар түсіруге ұйытқы болғанын мойындайды.

@grandpa.is.here #CapCut #grandpa #fyp #fashion ♬ Banana (feat. Shaggy) [DJ FLe - Minisiren Remix] - Conkarah

Қарттардың цифрлық белсенділігі

Қытайдың Қартаю мәселелерін зерттеу орталығының зерттеушісі Ян Сяоци «гранфлюенсерлер» санының артуын қарттардың өз ойларын ашық жеткізгісі келуімен байланыстырады. Олар үшін интернет қарым-қатынас пен өзін-өзі таныту алаңына айналды.

Қытай интернет-ақпарат орталығының деректеріне сәйкес, елде 1,12 миллиардтан астам интернет қолданушысы бар. Оның ішінде 161 миллион адам 60 жастан асқан.

Ян Сяоцидің айтуынша, қарт зейнеткер блогерлердің танымалдылығы – қарттық пен өмірге құштар, стильді адамдардың бейнесі арасындағы айқын айырмашылықпен түсіндіріледі. Олар қарттық — бұл өмірдің сөнуі емес, жаңа мүмкіндіктер кезеңі екенін көрсетіп жүр.

Сын-тегеуіріндер мен қатерлер

Жаңа құбылыстың танымалдығы артқан сайын белгілі бір қиындықтар да пайда бола бастады.

Сарапшылар интернеттегі шамадан тыс белсенділік егде жастағы адамдарға шабыт қана емес, сонымен қатар психологиялық жүктеме әкелуі мүмкін екенін ескертіп отыр.

— Егде жастағы блогерлер видео түсіруді «қаралым үшін жарыс» емес өмірді әртараптандырудың бір тәсілі ретінде қабылдауы маңызды. Дәстүрлі қолөнер, бағбандық немесе аспаздық туралы тәжірибе мен даналықты шығармашылық роликтер жасау арқылы бөліскен жөн сияқты, — дейді Ян Сяоци.

Цифрлық ортаға бейімделу оңай міндет емес. Көптеген қарт адам видеоны монтаждау, жүктеу сияқты техникалық қиындықтарға тап болып, пікірлерге жауап беруге келгенді іркіліп жатады.

«Күміс экономикасының» келешегі

ҚХР Азаматтық істер министрлігінің дерегіне қарағанда, 2024 жылдың соңына қарай Қытайда 60 жастан асқан 310 миллионнан астам адам өмір сүрді. Бұл ел халқының шамамен 22%-ын құрайды. 2035 жылға қарай бұл көрсеткіш 30 пайыздан асады деп күтіледі.

Осы аудиторияның үлкен әлеуетін ескере отырып, 2024 жылдың басында Қытай үкіметі «күміс экономикасын» дамыту жөніндегі нұсқаулық ұсынды. Құжатта зейнеткерлерге арналған телехикаялар, музыка, қысқа видеоларды қоса алғандағы контентті белсенді түрде дамыту, сондай-ақ егде буынның қажеттіліктеріне сай қызметтер мен технологияларды жетілдіру қажеттігі атап өтілген.

Бейжің коммуникация университетінің Телевидение мектебі деканының орынбасары Е Минжуй «күміс экономикасының» дамуы жағымды үрдіс деп санайды. Дегенмен, қателікке жол бермеу маңызды екеніне назар аудартады.

Оның атап өтуінше, қарттардың цифрлық қауіпсіздік пен дербес деректерді қорғау мәселелерін білуі керектігін айтады. Интернет қарттарға қуаныш әкелуі мүмкін. Алайда бұл сақтықты және отбасы мен қоғам тарапынан қолдауды қажет етеді.

Қытай Әлеуметтік қамсыздандыру қауымдастығының есебіне сәйкес, «күміс экономика» нарығының көлемі бүгінде 7 триллион юаньға (шамамен 984 млрд доллар) жеткен. Бұл елдің ЖІӨ-нің 6 пайызын құрайды. 2035 жылға қарай бұл көрсеткіш 30 трлн юаньға (4,2 трлн доллар) дейін ұлғаюы ықтимал.