Бір палаталы парламент азаматтар мүддесін тиімді қорғауды жеңілдетуі мүмкін

Бір палаталы парламентті және жаңа «Халық кеңесі» институтын құру азаматтардың мүдделерін тиімді қорғауға және парламенттің жұмысын жеңілдетуге мүмкіндік беруі мүмкін.

Мәжіліс депутаты Азат Перуашев осылай деп есептейді.

Конституциялық реформа 2022 жылы басталған ұзақ мерзімді әрі кезең-кезеңімен жүзеге асатын үдеріс. Қазіргі уақытта ұсынылып отырған негізгі өзгерістердің бірі - бір палаталы парламент - Құрылтайды және жаңа Халық кеңесі институтын құру. Мәжіліс депутаты Азат Перуашевтің айтуынша, бұл азаматтарды күнделікті толғандыратын мәселелерді мемлекеттік деңгейде көтеруге және заң шығару қызметіне шоғырланған парламенттің жұмысын жеңілдетуге мүмкіндік береді.

Азат Перуашев, ҚР Парламенті Мәжілісінің депутаты, конституциялық комиссия мүшесі:

- Қоғамды толғандыратын мәселелерді ең жоғары мемлекеттік билік деңгейінде көтере алатын халық кеңесі пайда болады. Себебі парламент негізінен заң шығару қызметімен, саяси және экономикалық мәселелермен айналысады. Ал азаматтарды күнделікті өмірде мазалайтын тұрмыстық мәселелер де өте маңызды. Алайда олар әрдайым парламент жұмысына ене бермейтін.

Депутаттың айтуынша, реформа Конституция мәтінінің шамамен 84 пайызын қамтиды. Онда азаматтардың құқықтары, әділ сот төрелігіне кепілдік, адвокатураның ролі және азаматтық құқықтарды қорғау қағидаттары нақтыланады.

Азат Перуашев, ҚР Парламенті Мәжілісінің депутаты, конституциялық комиссия мүшесі:

- Құжаттың негізгі нәтижелерінің бірі Конституцияның тікелей қолданылатын құжат ретіндегі сипатының күшеюі. Бүгінде іс жүзінде кей жағдайларда тіпті соттарда да Конституцияда бекітілген нормалар ескерусіз қалып жатады. Шешімдер салалық заңдарға, тіпті кейде министрліктердің бұйрықтарына сүйене отырып қабылданады. Сондықтан тұжырымдарды нақтылау, азаматтардың құқықтық кепілдіктерін, әділ сот талқылауына деген құқықтарын қатаң бекіту «Әділетті Қазақстан» қағидатын іске асырып, азаматтар мен қоғамның мемлекетпен қарым-қатынасындағы қорғалу деңгейін күшейтеді. 

Депутаттың пікірінше, бұл өзгерістер қоғам мен мемлекет арасындағы тұрақты кері байланысы бар теңгерімді саяси модель қалыптастыруға және азаматтардың құқықтарын қорғауды күшейтуге мүмкіндік береді.

Рухани Баужанова