Британияға визалар қолжетімді болуы мүмкін Қазақстан Парламенті жаңа келісімді қабылдады

Қазақстан Ұлыбританиямен арадағы виза мәселесін жаңа стратегиялық серіктестік туралы келісім арқылы шешуді көздеп отыр. Бүгін Сенат депутаттары бұл құжатты ратификациялады, деп хабарлайды Tengri Travel.

Қазақстан Ұлыбританиямен арадағы виза мәселесін жаңа стратегиялық серіктестік туралы келісім арқылы шешуді көздеп отыр. Бүгін Сенат депутаттары бұл құжатты ратификациялады, деп хабарлайды Tengri Travel.

Мәселе Қазақстан Республикасы мен Ұлыбритания және Солтүстік Ирландия Біріккен Корольдігі арасындағы стратегиялық серіктестік пен ынтымақтастық туралы келісім жайында болып отыр. Наурызда құжатты Мәжіліс депутаттары қабылдаса, бүгін оны Сенат мақұлдады.

Сыртқы істер министрінің орынбасары Арман Исетовтің айтуынша, құжат ратификацияланғаннан кейінгі алғашқы қадам студенттер, оқытушылар, ресми делегациялар мен бизнес өкілдері үшін виза беруді жеңілдету болуы мүмкін. Ұлыбритания кейінгі уақытта көші-қон саясатын күшейтіп жатқанына қарамастан, қазақстандық тарап екіжақты келіссөздерде бұл мәселені үнемі көтеріп келеді.

Ол келісімді ратификациялау виза режимін жеңілдетуді талқылауға және диалогты ілгерілетуге қосымша негіз болатынын атап өтті. 2025 жылы британдық үкімет көші-қонды азайту туралы ресми хабарлама ұсынды, ал 2026 жылғы 8 сәуірден бастап елде визалық алымдар өсті.

"Біз бұл процесті кезең-кезеңімен іске асады деп көреміз. Бірінші кезекте студенттер, профессор-оқытушылар құрамы, ресми делегациялар мен бизнес өкілдері үшін виза режимін жеңілдету. Бұл бағыттағы жұмыс британиялық әріптестермен келіссөздер, консультациялар аясында, сондай-ақ бейінді ведомстволар, сыртқы істер министрліктері мен елшілер деңгейінде жүргізіліп жатыр", - деді Исетов.

Қазақстан мен Ұлыбритания арасындағы келісімге 2024 жылғы 24 сәуірде Астанада қол қойылған болатын. Бұған дейін Парламентте бұл құжат саяси, экономикалық, құқықтық, гуманитарлық және экологиялық салалардағы ынтымақтастықты одан әрі дамыту үшін жүйелі негіз қалап, инвестициялар мен бірлескен жобалар үшін қосымша мүмкіндіктер ашуы тиіс екені айтылған еді.

Мәжілісте жаңа келісімнің қажеттілігі Ұлыбритания Еуропалық одақтан шыққаннан кейін екі ел арасындағы қарым-қатынасты Қазақстанның ЕО-мен ынтымақтастығының бұрынғы шеңберімен реттеу мүмкін болмай қалғанымен түсіндірілді.

Google News арқылы жаңалықтарымызды қадағалаңыз