БҰҰ: Әлем жолдарында жыл сайын 1,2 млн адам қаза тауып, 50 млн адам жарақат алады

Әлем бойынша жыл сайын жол-көлік апаттарынан 1,2 миллион адам көз жұмады, тағы шамамен 50 миллион адам түрлі жарақат алады. Бұл туралы БҰҰ Бас хатшысы Антониу Гутерриштің мәлімдемесін оның көмекшісі Навид Ханиф БҰҰ штаб-пәтерінде өткен жоғары деңгейлі іс-шара кезінде жария етті, деп хабарлайды АА.

«Бұл жай ғана статистика емес. Бұл – мектепке бара жатқан балалар, жұмысқа асыққан ата-аналар, бір сәтте өмірі өзгеріп кететін адамдар», – делінген БҰҰ баспасөз қызметі таратқан мәлімдемеде.

БҰҰ дерегінше, жол-көлік апаттары – әлемдегі өлім-жітімнің сегізінші негізгі себебі және бес жастан асқан балалар мен жастар арасындағы басты өлім себебі болып отыр.

«Мәселе әсіресе табысы төмен және орташа елдерде өткір. Әлемдегі жол апаттарынан болған өлімнің 90 пайызы дәл осы елдерде тіркеледі. Құрбандардың көбі – жаяу жүргіншілер, велосипед пен мотоцикл мінгендер және балалар. Яғни, қауіпсіз көлік пен сапалы жол инфрақұрылымына қолы жетпейтіндер», – делінген хабарламада.

Бас хатшының айтуынша, бұл мәселенің шешімі бар: қалаларды дұрыс жоспарлау, қауіпсіз қоғамдық көлікті дамыту, дулыға мен қауіпсіздік белдігін міндетті пайдалану, жылдамдықты бақылау және тиімді жедел көмек жүйелерін енгізу – осының бәрі мыңдаған адамның өмірін сақтап қалуға мүмкіндік береді.

БҰҰ жол қозғалысы қауіпсіздігін арттыру бағытындағы жұмыстарды белсенді қолдайды: қазіргі таңда 94 ел осындай көмек алған. Мысалы, Бразилияда жылдамдықты бақылау жүйесін енгізу өлім-жітімді азайтты, Рвандада дулыға тағу туралы заң күн сайын мотоцикл жүргізушілерінің өмірін сақтап отыр, ал Лаоста жүргізуші куәлігін беру жүйесінің жаңаруы жол қауіпсіздігін күшейтті.

Алдағы Тұрақты көлік онжылдығы қарсаңында БҰҰ жаңа серіктестік байланыстар орнатуға шақырды, бұл іске қайырымдылық ұйымдарының қатысуы ерекше маңызды екенін атап өтті.

«Сіздердің қолдауларыңыз полиомиелит, туберкулез, аштық және ана өлімі сияқты мәселелерді еңсеруге көмектесті. Енді осы күш-жігер жол қауіпсіздігі саласында да үлкен өзгеріс әкеле алады», – деді Антониу Гутерриш.

Оның айтуынша, жол қауіпсіздігі – тек денсаулық сақтау мәселесі емес, ол сонымен қатар даму, қалалық жоспарлау және климаттық әрекеттермен тығыз байланысты.

«Біз бірге әрекет етсек, миллиондаған адамның өмірін сақтап, жолдарда қауіпсіздікке жасыл жарық қоса аламыз», – деп түйіндеді БҰҰ Бас хатшысы.

Бүгін, 11:41