Душанбеде академик Қаныш Сәтбаевты еске алды

Геология, сейсмологиялық құрылыс және сейсмология институтында Тәжікстан Ұлттық ғылым академиясының тұңғыш құрметті академигі Қаныш Сәтбаевтың ескерткіш тақтасына гүл шоқтарын қою рәсімі өтті.

ТР Ұлттық ғылым академиясының вице-президенті Илхом Амонзода құттықтау сөзінде Қаныш Сәтбаевтың есімі әлемдік ғылым тарихында, әсіресе Орталық Азия аймағында ерекше орын алатынын атап өтті.

— Оның есімі тек біздің ғылыми мұрамызды ғана емес, сонымен қатар бүгінде халықтарымыз арасында белсенді дамып отырған берік тарихи байланысты да білдіреді. Бүгінде біз ұлы ғалымға құрмет көрсетіп қана қоймай, сонымен қатар ғылымды дамытуға деген адалдығымызды тағы да растаймыз. Қаныш Сәтбаевтың өмірі мен еңбегінің үлгісі бізді жаңа ғылыми жетістіктерге шабыттандырады, ғылыми мектептеріміздің дамуына үлес қосады және достығымыз нығайтады, — деді И. Амонзода.

Қазақстан елшісі Уәлихан Төреханов Ұлттық ғылым академиясы мен институт басшылығына Қаныш Сәтбаевтың есімін тәжік жерінде еске алуға мүмкіндік берген іс-шараны ұйымдастыруға көмектескені үшін алғыс білдірді.

Дипломат оның ғылыми және практикалық қызметі кеңдігі мен алуан түрлілігімен ерекшеленіп, Тәжікстанның негізгі ғылыми және академиялық мекемесінің дамуына айтарлықтай үлес қосқанын атап өтті.

— Геологиялық және минералогиялық ғылымдар саласындағы көрнекті ғалым ретінде Қаныш Имантайұлы Тәжікстан Ғылым академиясын құру аясында тағы бір институт — Тәжік сейсмология институтын құруды ұсынды. Ол республиканың жоғары сейсмикалық аймақта орналасқанын және сейсмологиялық зерттеулердің ірі өнеркәсіптік кәсіпорындар, әлеуметтік және қоғамдық нысандар, тұрғын үйлерді салудың ұзақ мерзімді мәселелерін шешуде маңызды рөл атқаратынын мойындады, — деп атап өтті У. Төреханов.

Осыған дейін Тәжікстанда қазақстандық бітімгерлерді еске алу рәсімі өткенін жаздық.