Елордада фильтр кабинеттері демалыссыз жұмыс істейді

Астанадағы емханалардың фильтр кабинеттері күшейтілген жұмыс кестесіне көше бастады. Енді ақхалаттылар демалыс күндері де науқастарды қабылдайды. Өйткені кейінгі айда тұмау мен ЖРВИ-дің күрт таралуы байқалды. Дәрігерлер науқастарды емдеумен қатар аурудың алдын алу бойынша жан-жақты кеңес беріп жатыр.

Қаладағы №13 емхананың фильтр кабинетіне күн сайын кемінде 100-ден астам адам келіп жатыр. Бұл алдыңғы айлармен салыстырғанда шамамен 30-40 пайызға көп. Науқастардың көбі тұмау мен ЖРВИ-ге шалдыққан. Әсіресе балалар жиі жұқтырады. 

Виктор Сон, қала тұрғыны:

- Мұнда жиі келетін болдық. 3 жасар қызымды қайта-қайта жөтел қысып жүр. Дәрігерлер ЖРВИ диагнозын қойды. Ал өзіме еңбекке уақытша жарамсыздық туралы анықтама алдым. Енді мұқият емделеміз.

Дархан Құлмахан, фильтр кабинетінің фельдшері:

- Тұмауда, ең біріншіден, дене қызуының көтерілуі 38-44 градус аралығында. Сосын бастың ауыруы, жақтардың құрысуы. Ал ЖРВИ-де тамақтың қызаруы, температураның көтерілуі  байқалады. Қазіргі таңда демалыссыз, сенбі мен жексенбі аралығында жұмыс істеп жатырмыз.

«Тұмау белгілері байқалған жағдайда науқастар бірден медициналық көмекке жүгінген абзал», - дейді ақхалаттылар. Өйткені өз бетінше емделудің ақыр-соңы аурудың асқынуына апарып соғуы мүмкін. Әсіресе дәрігердің нұсқауынсыз антибиотик қолдануға болмайды. Ал қарапайым дәрі-дәрмекті нақты кесте бойынша қабылдау керек.

Наргиз Тоқсейтова, №13 қалалық емхананың үйлестіруші-дәрігері:

- Ибупрофен мен парацетамоллды алмастырып бере беруге болады. Тек арасындағы уақытты, яғни 5-6 сағат интервал сақтау керек. Ата-аналар өздігінен ингаляция тағайындайды. Бұл көрсеткіш емес. Ингаляцияны біз тек тыңдап болғаннан кейін, қандай да бір көрсеткіш болса ғана тағайындаймыз.

Мамандар аурудың алдын үшін бөлменің ауасын тазартып тұруға, далада серуендеуге, қоғамдық орындарда бетперде тағуға және қолды жиі жууға кеңес береді.

Авторлары: Еркебұлан Смадияров, Мұрат Әріпханов