Енді Саранда дамуы кешеуілдеген балаларды қолдау кабинеттері жұмыс істейді

Қарағанды облысы, Саран қаласында үш жасқа дейінгі балаларға ерте қолдау көрсететін кабинет ашылды. Енді ерекше білім беруді қажет ететін немесе даму жағынан тәуекел тобына кіретін бүлдіршіндерге көмек алу үшін жеке орталықтарға жүгінудің немесе облыс орталығына барудың қажеті жоқ, деп жазады Egemen.kz.

Жаңа қызмет 2023 жылдан бері Саран қаласында жұмыс істеп келе жатқан №8 психологиялық-педагогикалық түзету кабинеті базасында ашылды. Бұған дейін ата-аналар ерте түзету көмегін алу үшін жеке орталықтарға жүгінуге немесе Қарағандыға баруға мәжбүр болатын.

Кабинет «Дара» қоры мен «Шеврон» компаниясының қолдауымен жүзеге асырылып жатқан «Мүмкіндіктер уақыты» жобасы аясында құрылды.

«Біздің басты міндетіміз — баланың даму ерекшеліктерін дер кезінде байқап, ата-аналардың алаңдаушылықтан сенімділікке қарай жол табуына көмектесу. Қызметтің ашылуы – қаладағы инклюзивті білім беру жүйесі үшін маңызды қадам, өйткені енді ең кішкентай балалар да кәсіби қолдауды уақытылы ала алады», дейді №8 ТППК басшысы Құралай Құлмағамбетова.

Сабақ өткізу үшін жайлы дамытушы орта жасақталды: ғимарат демеушілік көмектің есебінен жөнделіп, қажетті жабдықтармен қамтамасыз етілді. Бөлме бес аймаққа бөлінген: танымдық, қимыл-қозғалыс, коммуникативтік, сондай-ақ өз-өзіне қызмет көрсету және әлеуметтік өзара әрекеттесу аймақтары. Мұндай тәсіл әр балаға жеке маршрут құрып, қажетті дағдыларды қалыптастыруға мүмкіндік береді.

Кабинет толыққанды жұмысын жаңа жылдан бастайды. Екі трансдисциплинарлық маман даярлықтан өтіп жатыр және логопедия, дефектология және психология бағыттары бойынша сабақ жүргізетін болады. Егер ата-аналар баласының сөйлеуі кешігуін, қарым-қатынастағы қиындықтарды, ұйқының бұзылуын немесе дамудағы өзге де кешеуілдеуді байқаса, бұл жерге жолдамасыз келе алады. Қызметтердің барлығы тегін ұсынылады.

«Дара» қорының «Ерте қолдау» жобасының жетекшісі Айгүл Табергенова мұндай қызметтер тиімділігі дәлелденген заманауи тәсілді енгізетінін айтады: ол баланың дамуына аса маңызды кезеңде әсер етіп, қоғамға бейімделуіне ықпал етеді әрі ата-аналарды қолдайды.

«Мүмкіндіктер уақыты» жобасы Қазақстанда екінші жыл жүзеге асырылып келеді. Алғашқы ерте қолдау кабинеттері Қарағанды мен Шахтинскіде ашылған. 2026 жылға дейін мұндай қызметтерді Қарағанды облысындағы барлық ТППК мен оңалту орталықтарында құру жоспарланып отыр.