Ем қабылдап жатыр : Айдос Үкібай Сара Назарбаеваның қайда екенін айтты

АСТАНА, 17 қазан - Sputnik. Нұрсұлтан Назарбаевтың баспасөз хатшысы Айдос Үкібай Қазақстанның тұңғыш президентінің жұбайы Сара Назарбаеваға қатысты таралып жатқан ақпаратқа түсініктеме берді.

Ол соңғы уақытта кейбір бұқаралық ақпарат құралдарында және әлеуметтік желілерде Сара Назарбаеваның денсаулығы мен қазіргі жағдайына қатысты әртүрлі болжамдар мен шындыққа жанаспайтын ақпараттар таратылып жатқанын айтты.

"Осыған орай ресми түсініктеме беруді жөн деп санаймын: сәуір айынан бері Сара Назарбаева Алматы қаласындағы Президент Іс басқармасының медициналық орталығына қарасты Ұлттық госпитальде жоспарлы ем қабылдап келеді. Барлық медициналық шара бекітілген стандарттарға сай, отандық мамандардың бақылауымен жүзеге асырылып жатыр", - деп жазды Үкібай.

Ол БАҚ өкілдері мен әлеуметтік желі қолданушыларын Сара Назарбаеваның есімін тексерілмеген ақпаратпен байланыстырмауға, негізсіз пайымдар таратуға жол бермеуге шақырды.

Еске салайық, биыл мамырдың ортасында да Сара Назарбаеваның дүниеден озғаны туралы ақпарат тарады. Ол кезде де Айдос Үкібай бұл ақпараттың шындыққа жанаспайтынын хабарлады.