Еңбек нарығында жұмысшы мамандықтарға сұраныс артты

Біздің елде биыл жұмысшы мамандықтар жылының жариялануы бекер емес. Осы тұста өз ішіміздегі жағдай қалай деген сұрақ туындайтыны анық.

Еңбек нарығында жұмысшы мамандығына сұраныс артып тұр. Әсіресе құрылыс, көлік-логистика және қызмет көрсету салаларына аса қажет. Еңбек биржасында 723 жұмыс беруші 7 мыңнан астам қызмет ұсынып отыр. Мұның жартысынан көбі қол күшін қажет ететін қызметтер.

Дуньягозель Байимова құрылыс бұйымдарын өндіретін зауытта маңдайалды жұмысшылардың бірі. Аспалы кранның тізгіні осы кісінің қолында. Салмағы 8 тоннаға дейін баратын қада, плиталарды көтеріп, жүк көлігіне тиейді. Ол 2004 жылы мансап орталығы арқылы арнайы оқыту курсынан өткен. Бүгінде құрылыс техникасын басқарып жүргеніне 20 жылдан астам уақыт өтіпті.

Аспалы кранды басқару – жауапкершілігі жоғары жұмыс. Әр қозғалыс дәлдік пен зейінді қажет етеді. Ал осы ауыр техниканы ұршықша үйіріп жүрген кейіпкеріміз – өз ісінің нағыз шебері.

Дуньягозель Байимова, кран машинисі:

- Көбі менен: «биіктен қорықпайсың ба?», – деп сұрайды. Алайда мен үшін бұл адреналин. Мамандығым өзіме өте ұнайды. Тұрғын үй құрылысына атсалысып, адамдардың жылы, жайлы жерде өмір сүруіне үлес қосу мен үшін үлкен мәртебе.

«Елорда – жылдан-жылға көркейіп келе жатқан алып шаһар. Мұнда құрылыс қарқынды. Сондықтан өндіріс мамандарына сұраныс үнемі жоғары», – дейді зауыт қызметкерлері.

Жанат Әбдірахманова, кадр бөлімінің басшысы:

- 2025 жыл Президент Қасым-Жомарт Тоқаевтың бастамасымен «Жұмысшы мамандықтар жылы» болып жарияланды. Біздің зауытта қызметкерлердің 80%-і жұмысшы мамандар. Әріптесіміз Дуньягозель Нұрмұратқызының мамандығы – мұнаралы кран жүргізушісі. Бұл әйелдер арасында өте сирек кездесетін бағыт. Мұндай тәжірибелі мамандар өз білімі мен дағдысын жастарға үйретіп, білікті кадр даярлауға үлес қосуы керек деп ойлаймын.

Биыл қалалық мансап орталығында 100-ге жуық азамат өндірістік мамандықтар бойынша қысқа мерзімді курстарға жіберілді. Бұдан бөлек елордада 40-тан астам бос орындар жәрмеңкесі ұйымдастырылды. Нәтижесінде жұмысшы мамандығын меңгерген азаматтарға сұраныс артпаса, кеміген емес.

Бағила Орынбетова, Астана қалалық мансап орталығының басшысы:

- Мысалы, құрылыс саласында түрлі инженерлерден бастап қарапайым жұмысшы мамандықтарға дейін тапшы. Медицина саласында әртүрлі бағыттағы дәрігерлер және жұмысшы мамандар бойынша санитар, медбикелер тапшы. Ал қызмет көрсету саласында аспаздан бастап тігіншіге дейін сұраныс жоғары. Логистика саласына келер болсақ, түрлі көлік жүргізушілері, жеңіл көлік және әртүрлі категориялы жүргізушілер тапшы болып жатыр.

Айта кеткен жөн, биылдыққа 18 мыңнан астам астаналық жұмыс іздеп өтініш беріп, 5 мыңы тұрақты жұмыс тапты. Оның 3 мыңға жуығы жұмысшы маман.

Авторлары: Дильназ Тұрғазыева, Мерей Талап, Абдулхамит Бөлекбаев