Энергетика министрлігі Теңізде мұнай өндірудің төмендегенін мойындады

Қазақстан Энергетика министрлігі Теңіз кен орнындағы жағдайға қатысты пікір білдірді. Ведомство мұнай өндірісінің уақытша азаюына әкеп соққан ақау шыққанын растады, деп хабарлайды Tengrinews.kz тілшісі.

Қазақстан Энергетика министрлігі Теңіз кен орнындағы жағдайға қатысты пікір білдірді. Ведомство мұнай өндірісінің уақытша азаюына әкеп соққан ақау шыққанын растады, деп хабарлайды Tengrinews.kz тілшісі.

Бейінді министрлік мәліметінше, қазіргі уақытта компания қажетті жедел шараларды қабылдап жатыр және кен орнындағы өндіру процесі "қалпына келтіру сатысында".

"Қызметкерлер, халық және қоршаған орта үшін ешқандай қауіп тіркелген жоқ. Қазіргі жағдай Энергетика министрлігінің тұрақты бақылауында", – деп мәлімдеді министрдің кеңесшісі – энергетика министрлігінің ресми өкілі Әсел Серікпаева.

Ал "Теңізшевройл" компаниясы өзі бұл ақауды "болмашы" деп сипаттап, егжей-тегжейін ашып айтпады.

Анықтама: "Теңізшевройл" (ТШО) ЖШС - Атырау облысындағы Теңіз және Королевское кен орындарын игерумен айналысатын мұнай-газ кәсіпорны. Қазақстандағы ең ірі мұнай өндірушілердің бірі. Компания өндіретін мұнайдың басым бөлігі Каспий құбыр консорциумы (КҚК) арқылы экспортталады.

18 қаңтарда Теңіз кен орнында өрт шықты.

Келесі күні "Теңізшевройл" компаниясы Теңіз бен Королевское кен орындарында мұнай өндіру тоқтатылғанын хабарлады. Арнайы комиссия құрылды.

26 қаңтарда Энергетика министрлігі Королевское кен орны іске қосылғанын хабарлады. 31 қаңтарда Теңізде мұнай өндіру қайта басталды.