Еуроодақ Украинаға қаржылай көмектің жаңа траншын берді

АСТАНА, 22 желтоқсан – Sputnik. Еуропалық комиссия Украина бюджетін қолдау үшін 2,3 миллиард еуро көлемінде жаңа транш аударды, деп жазылған ЕК сайтында жарияланған мәлімдемеде.

"Еуропалық комиссия Украинаға мемлекет қаржысын және билік органдарының жұмысын қолдау үшін 2,3 млрд еуро бөлді", – делінген құжатта.

Мәлімдемеде бұл Ukraine Facility механизмі аясындағы алтыншы жоспарлы төлем екені аталып өткен.

"Осы алтыншы траншты есепке алғанда, 2024 жылғы наурыздан бастап Еуроодақ Украинаға 26,8 млрд еуро аударды, бұл Ukraine Facility механизмі бойынша бірінші бағандағы қаражаттың шамамен 70%-ға жуығын құрайды", – делінген мәлімдемеде.

ЕО дипломатиясының басшысы Кая Каллас 1 желтоқсанда Еуропалық Одақ 2022 жылғы ақпаннан бері Украинаға 187 миллиард еуродан астам қаржы бергенін мәлімдеді.

19 желтоқсанға қараған түні Брюссельде өткен саммит қорытындысы бойынша ЕО Ресей активтерін тәркілеу жоспарын уақытша тоқтатып, Украинаға өз бюджетінен 90 миллиард еуро көлемінде несие беруге шешім қабылдады. ЕО кеңесі Венгрия, Словакия және Чехия бұл несиені жеткізуге қатыспайтынын хабарлады.