Флорида әуежайы Трамптың есімімен аталуы мүмкін

Флорида штатының заң шығару жиналысы Палм-Бич халықаралық әуежайы атауын АҚШ Президенті Дональд Трамптың құрметіне өзгерту туралы заң жобасын мақұлдады. Енді құжатқа Рон Десантис қол қоюы тиіс.

Заң жобасына сәйкес әуежай «Президент Дональд Дж. Трамп атындағы халықаралық әуежай» деп аталатын болады. Флорида Сенаты құжатты Өкілдер палатасы мақұлдағаннан кейін қабылдады. Республикашылдар Сенатта да, Өкілдер палатасында да айтарлықтай басымдыққа ие.

- Елу жылдан кейін біз бұл залда болмасақ та, тіпті бұл дүниеде өмір сүрмесек те, осы президенттің Американы құтқару үшін жасаған істерін мойындаймыз, — деді Республикашыл сенатор Дэнни Берджесс.

Губернатор Десантис әзірге заң жобасына қол қоятыны туралы мәлімдеме жасаған жоқ.

2024 жылғы республикашыл праймериз кезінде Трамп оны қатаң сынға алған болатын. Кейін Десантис Трамптың кандидатурасын қолдады.

Палм-Бич халықаралық әуежайы Трамптың жеке клубы Мар-а-Лаго маңында орналасқан. АҚШ президенті бұл әуежайды жиі пайдаланады және оған Air Force One ұшағымен келеді. 

Айта кетелік Трамп өзінің құрметіне вокзал мен әуежайдың атауын өзгерткісі келетіні туралы жазған едік.