Францияда студенттің қазасы сайлау қарсаңында солшылдарға қысымды күшейтті

22 жастағы Кантан Деранк 12 ақпанда университет жанында өткен шағын наразылық акциясынан кейін шабуылға ұшыраған. Ол ультраоңшыл феминистік топ ұйымдастырған іс-шараның қауіпсіздігін қамтамасыз етіп жүрген. Әлеуметтік желілерде тараған бейнежазбада бетперде киген жастардың оны жерге құлатқаннан кейін бірнеше рет тепкілеп, соққыға жыққаны көрінеді.

Басынан алған ауыр жарақат салдарынан студент көз жұмған.

Оқиғадан кейін Франциядағы солшыл радикалдық бағыттағы «La France Insoumise» партиясы мен оның көшбасшысы Жан-Люк Меланшонға қатысты сын күшейді. Ұлттық жиналыста бұл партия шамамен 70 депутатпен ұсынылған.

Қылмысқа қатысы бар деген күдікпен жеті адамға айып тағылған. Тергеу мәліметінше, олар бұған дейін «La Jeune Garde» ұйымының мүшелері немесе жақтастары болған. Бұл ұйым өткен жылы тыйым салынғанға дейін «La France Insoumise» партиясының іс-шараларын күзетумен айналысқан.

Күдіктілердің бірі Жак-Эли Фавро «La France Insoumise» депутаты Рафаэль Арноның парламенттік көмекшісі болған. «La Jeune Garde» ұйымын 2018 жылы дәл осы Арно құрған.

Фавроға «өлтіруге итермелеу арқылы сыбайластық жасау» бабы бойынша айып тағылған. Тергеу нұсқасына сәйкес, ол өлімге әкелген соққыларды тікелей жасамаған.

Оқиға Франциядағы сайлау науқаны қарсаңында радикал саяси күштердің қоғамдағы орны мен жауапкершілігіне қатысты қызу пікірталас тудырды.

Айта кетейік, Францияда оппозицияның үкіметке сенімсіздік вотумын жариялауы сәтсіз аяқталды.