Ғалымдар салқындатылған құс етінің сақтау мерзімін 3 есеге дейін ұзартатын технология әзірледі

Қазақстандық ғалымдар салқындатылған құс етінің сақтау мерзімін нитраттар мен нитриттерді қолданбай, 0±1 °C температурада 20 тәулікке дейін, яғни шамамен үш есеге арттыруға мүмкіндік беретін инновациялық технологияны ұсынды, – деп хабарлайды Aikyn.kz. Бұл шешім ішкі нарықты дамытуға және саланың экспорттық әлеуетін кеңейтуге жол ашады.

Инновацияның негізін сүт сарысуы мен Lactococcus lactis ssp. lactis F-116 гибридті штамының бактериоцині негізінде жасалған антимикробтық тағамдық жабын құрайды. Әзірленген биоконсервант Pseudomonas, Salmonella және Listeria секілді негізгі патогендердің дамуын тежейді. Сонымен қатар  оның құрамында улы химиялық қоспалар жоқ және ол  Clean Label  халықаралық тұжырымдамасына сай келеді.

Бұл жабынды қолдану салқындатылған шикізаттың микробиологиялық бұзылуын едәуір баяулатып, ұзақ уақыт бойы сапасын сақтауға мүмкіндік береді.

FAO деректеріне сәйкес, 2030 жылға қарай құс еті әлемдік ет нарығының шамамен 41%-ын құрайды. Мұндай жағдайда салқындатылған өнімнің сақтау мерзімін ұзарту бәсекеге қабілеттіліктің стратегиялық маңызды факторына айналмақ.

Сақтау мерзімін 20 тәулікке дейін ұзарту жеткізу логистикасының ауқымын кеңейтіп, өнімнің бұзылуынан болатын шығындарды азайтады, салқындатылған ет экспортын ұлғайтып, өнімнің қосылған құнын арттырады.

2023-2025 жылдары жүргізілген зерттеулер аясында ғалымдар құс етінің криоскопиялық және шекті салқындату температураларын анықтады, қабықша түзуші құрамның оңтайлы концентрациясын негіздеп, ұшаларды өңдеу бойынша ұсынымдар әзірледі, ұзақмерзімді сақтау кезінде органолептикалық көрсеткіштердің сақталатынын дәлелдеді және жабынды жағу бойынша технологиялық нұсқаулық дайындады.

Технология өндірістік сынақтан өтіп, «Медеу 55» әлеуметтік кәсіпкерлік корпорациясына енгізілді.
Әзірлеме отандық микроорганизм штамдары мен сүт сарысуын пайдалануға негізделген. Бұл ауыл шаруашылығы шикізатын терең өңдеуге және импорттық тағамдық қоспаларға тәуелділікті азайтуға ықпал етеді.

Технология ауқымды деңгейде қолдануға дайын әрі қазақстандық ет өнімдерінің ішкі және сыртқы нарықтардағы бәсекеге қабілеттілігін арттырудың тиімді құралы бола алады.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.