Ғасыр үні жаңғырған кеш

Egemen.KZ парақшасындағы деректерге сәйкес, Qazaq24.com ақпарат таратты..

«Астана Опера» театры қазақтың аңызға айналған баритоны, КСРО Халық әртісі, Мемлекеттік сыйлықтың лауреаты, Социалистік Еңбек Ері Ермек Серкебаевтың 100 жылдығына арналған ауқымды концерттер легін бастады. Өнер ордасы әншінің рухына тағзым етіп, сахна саңлағының шығармашылық мұрасын жаңғыртуға бағытталған арнайы жобаны көрермен назарына ұсынды.

Соның бірі – Күләш Байсейітова атындағы камералық зал сахнасында өткен «Өнер тарландары» топтамасы аясындағы алғашқы концерт. «Ұлы дала дауысы» деп аталған музыкалық кеште опера труппасының солистері мен шақырылған әртістер Ермек Серкебаевтың опералық, камералық, сонымен қатар халық әндері репертуарынан туындылар тарту етті. Фортепиано партиясын орындаған театрдың музыкалық кеңесшісі, Қазақстанның еңбек сіңірген қайраткері Раушан Бескемпірова баритонның қазақ музыка мәдениетіндегі орнына тоқталды:

– Ермек Бекмұхамедұлы – қазақ музыка мәдениетінің аса көрнекті өкілдерінің бірі, ұлттық өнердің дамуына өлшеусіз үлес қосқан тұлға. Ең алдымен, Ермек Серкебаев қазақтың кәсіби вокалдық өнерін әлемдік деңгейге көтерген әнші ретінде бағаланады. Ол – опера мен камералық вокал жанрында ерекше шеберлігімен танылған лирикалық баритон дауыс иесі. Әсіресе әншінің орындауында қазақтың халық әндері мен отандық композиторлардың шығармалары терең мазмұнға, биік көркемдік деңгейге ие болды. Аңызға айналған тұлғаның 100 жылдығына театрымызда тұтас концерттер легінің арналу себебі – біз өнер иесінің барлық қырын ашқымыз келеді, – деп атап өтті. Сондай-ақ ол сонау 90-жылдары Ермек Серкебаев Көкшетауға гастрольмен барған кезінде өнер иесінің шығармашылық концертін фортепианода сүйемелдеген сәтін жылы еске алды:

– Ол кісі шырқаған классикалық туындыларды сүйемелдедім, ал халық әні «Япурайды» орындағанда фотепианода Ермек ағаның өзі ойнады. Сол кезде әншінің аспапты қалай шебер меңгергеніне һәм суырыпсалмалық дарынына айрықша тәнті болдым. Консерваторияны енді ғана бітіріп келген мен үшін бұл таңғаларлық жайт еді. Атақты Ермек Серкебаевпен бір концертте өнер көрсетіп, аңыз тұлғаның шығармашылығына өз үлесімді қосу зор мақтаныш, – деді музыкант.

Қазақ опера өнерінің дамуына өлшеусіз үлес қосқан Ермек Серкебаев ұлттық репертуардың қалыптасуына да зор ықпал етті. Өнер иесінің сахна мәдениеті мен актерлік шеберлігі кейінгі буын әншілерге де өнеге болды. Сол ізбасарлардың бірі – Қазақстанның халық әртісі, Мемлекеттік сыйлықтың лауреаты Шахимардан Әбілов.

– Қазақ опера өнері мен үшін Ермек Серкебаев есімімен егіз өріліп жатыр десем, қателеспеймін. Себебі ол кісі ұлттық вокал мектебінің әсем үні мен терең болмысын әлемдік сахнаға танытып, КСРО мен Еуропа театрларында өнер көрсетіп, қазақ өнерінің абыройын асқақтатты. Сол кезеңдегі талай жас әншіге бой түзер тамаша үлгі бола білді. 1981 жылы Құрманғазы атындағы консерваторияда бірге қызмет атқарып, маған да әншінің тағылымды әңгімелерін тыңдау бақыты бұйырды. Ал 1991 жылы тәуелсіздік жарияланған сәттегі: «Біз егемен ел болдық!» деген толқынысты сөзі әлі күнге дейін жадымда сақтаулы. Қазақтың халық әндерін әлемге таныту – Ермек ағаның асыл арманы еді. Бұл кеш – ұлы дауысқа тағзым ғана емес, ұлттық өнердің биік рухына жасалған құрмет, – деп әнші аға туралы сағыныш пен құрметке толы естелігін ағынан ақтарыла әңгімеледі.

Концертте «Екі жирен», «Шәпибай-ау», «Қызыл бидай», «Тілеу-Қабақ», «Алқоңыр», «Япурай», «Бір бидай-арпа» сынды халық әндері шырқалды. Сонымен қатар Біржан салдың «Бурылтай», Ақан серінің «Сырымбет», Жаяу Мұсаның «Сұрша қыз», Абайдың «Айттым сәлем, Қаламқас» әндері кеш көркін қыздырды.

Шақырылған әртістермен бірге сахнаға «Астана Опера» солистері – Қазақстанның еңбек сіңірген қайраткерлері Айгүл Ниязова, Талғат Мұсабаев, Жан Тәпин, Қазақстанның еңбек сіңірген әртісі Жаннат Бақтай, сондай-ақ Саян Исин бастаған өзге де өнерпаздар шықты. Тағылымды кеште көрермен тек музыкалық туындыларды тыңдап қана қоймай, Ермек Серкебаевтың өмір жолы мен шығармашылық мұрасы туралы мазмұнды әңгімелерге де қанықты.

Айта кетерлігі, ЮНЕСКО 2026 жылға арналған атаулы даталар күнтізбесіне Ермек Серкебаевтың 100 жылдық мерейтойын енгізді. Осыған орай «Астана Опера» мерейлі дата қарсаңында концерттер циклін бастаған елордадағы алғашқы театрлардың бірі болды.

Соңғы жаңалықтар