Ханзада Уильям британдық шоу эфирінде Қазақстан мен ақбөкендерді еске алды

Ұлыбританиялық ханзада Уильям Грэм Нортонның шоуына қатысып, әңгіме барысында Қазақстандағы киіктер популяциясы қалпына келгені туралы айтты. Ол мемлекеттік қолдау мен еліміздің далалық экожүйесін сақтауға көмектесетін "Алтын дала" табиғат қорғау жобасының рөлін атап өтті, деп хабарлайды Tengri Life.

Ханзада Уильям қатысқан бағдарлама BBC арнасынан 23 қазанда шықты. Онымен бірге студияда актрисалар Кейт Бланшетт пен Ханна Уэддингем, сондай-ақ табиғат жанашыры Роберт Ирвин болды.

Ханзада Уильям киіктер туралы не деді?

Әңгіме барысында жүргізуші киіктің ерекше сырт келбетіне назар аударды. Бұған жауап ретінде Уильям бұл түрдің бұрын жойылып кету алдында тұрғанын, бірақ оны сақтап қалу жолындағы күш-жігердің арқасында жануарлар санын айтарлықтай арттыру мүмкін болғанын айтты.

"Бір кездері бұл киік түріне жойылу қаупі төнген еді, бірақ қазір оның популяциясы қайта көбейді. Мұның бәрі Қазақстан Үкіметі бұл түрдің ел үшін және табиғатты қорғау үшін қаншалықты маңызды екенін түсініп, оған толық қолдау көрсеткенінің арқасында жүзеге асты", - деді ол.

Instagram-дағы бұл жазбаны көру

A post shared by Embassy of Kazakhstan in the UK (@kazakhembassy_uk)

Сондай-ақ Уильям жабайы жануарлар популяциясын қалпына келтірудің сәтті мысалдарының біріне айналған "Алтын дала" табиғат қорғау бастамасын тілге тиек етті.

"Алтын Дала" жобасы туралы не белгілі?

"Алтын Дала" - Қазақстанның дала, шөлейт және су-батпақты экожүйелерін қалпына келтіруге бағытталған табиғат қорғау бастамасы.

Жоба мемлекеттік құрылымдар мен табиғат қорғау ұйымдарын, соның ішінде Қазақстанның биоалуантүрлілікті сақтау қауымдастығын, Fauna & Flora, Франкфурт зоологиялық қоғамын және Ұлыбританияның Корольдік құстарды қорғау қоғамын біріктіреді.

Жұмыс бағыттарына браконьерлікпен күрес, жануарлардың көші-қонын бақылау, олардың мекендеу орындарын сақтау және ерекше қорғалатын табиғи аумақтарды кеңейту кіреді.

2024 жылы "Алтын дала" "Табиғатты қорғау және қалпына келтіру" номинациясы бойынша халықаралық Earthshot Prize экологиялық сыйлығының жеңімпазы атанды. Сыйлықты ханзада Уильям ұлыбританиялық натуралист Дэвид Аттенборомен бірге тағайындаған. Жеңімпаз табиғатты қорғау жұмыстарын дамытуға бір миллион фунт стерлинг алды.

Бастаманың ұзақ мерзімді мақсаттары қатарында 2030 жылға қарай киіктер санын төрт миллионға жеткізу және 8,5 миллион гектар жерді белсенді қорғаумен қамтамасыз ету бар. Бұл ретте жануарлар саны бойынша межеге ерте қол жеткізілді: 2024 жылғы көктемгі есеп нәтижесі бойынша Қазақстанда шамамен 4,689 миллион киік бар.

Оның ішінде шамамен 2,7 миллионы Жайық популяциясына, 1,87 миллионы Бетпақдала популяциясына және 119 мыңы Үстірт популяциясына жатады. Былтырғымен салыстырғанда жалпы сан 18 пайызға жуық өскен.

Қазақстан киіктер популяциясын қалай қалпына келтірді?

2000-жылдардың басында киіктер браконьерлік және басқа да факторлар салдарынан үлкен қауіпке ұшырады. 2003 жылы Қазақстанда жануарлар саны шамамен 21 мың болған. 2015 жылы ауру өршіп, киіктердің жаппай қырылуы олардың популяциясының қаншалықты осал екенін тағы көрсетті.

Біртіндеп жануарларды қорғау, мүйіздердің заңсыз саудасымен күрес, ғылыми зерттеулер және мекендеу орындарын қалпына келтірудің арқасында киіктер саны өсе бастады. 2023 жылы Халықаралық табиғатты қорғау одағы Қызыл тізімдегі түрдің мәртебесін "жойылып кету алдында тұрған" деңгейден "осал күйге жақын" деңгейге дейін жақсартты.

Бізді Google-дың негізгі дереккөздер тізіміне қосыңыз

Қосу